Олимпийн аварга Н.Түвшинбаяр багын найз Э.Энхбатыг зодож, биед нь хүнд гэмтэл учруулсан. Уг хэргээс үүдэж олимпийн аварга Н.Түвшинбаяр хуулийн байгууллагад шалгуулж байгаа юм.
Та бүхэндээ мэдээллийг эргэн сануулахад энэ оны дөрөвдүгээр сард Н.Түвшинбаяр нь улсын начин Э.Энхбатыг зодсон бөгөөд Э.Энхбат начин ГССҮТ-д хэвтэн эмчлүүлж байгаад биеийн байдал нь дээрдэхгүй байсан учраас ар гэрийхэн нь түүнийг БНСУ руу эмчлүүлэхээр авч явсан.
Өнөөдрийн байдлаар улсын начин Э.Энхбатын /2021.12.07/ биеийн байдал нь хүнд хэвээрээ БНСУ-д эмнэлэгт хэвтэн эмчлүүлж байгаа бөгөөд ухаан ороогүй хэвээр байгаа талаар түүний өмгөөлөгч мэдээллээ.
Э.Энхбатын өмгөөлөгчийн зүгээс зүйл ангиа өөрчлөх хүсэлтийг Прокурорын байгууллагад өгсөн байна. Тодруулбал, зүйл ангийг өөрчлөх хүсэлт нь Эрүүгийн хуулийн 11.1.2 дахь хэсэгт зааснаар хүний биед санаатай гэмтэл учруулах гэмт хэрэг, хүндрүүлэх нөхцөл байдалтайгаар үйлдсэн гэх зүйл ангиар өөрчилж өгөх хүсэлтийг гаргажээ. Энэхүү зүйл анги нь 5-12 жилийн хорих ялтай юм байна.
Одоогийн байдлаар Э.Энхбатын өмгөөлөгчийн зүйл ангиа өөрчлөх хүсэлтэд Прокурорын байгууллагаас хариу ирүүлээгүй гэх мэдээллийг өгч байгаа юм.
Сэтгэгдэл (0)
Сэтгэгдэл бичигдээгүй байна