БНХАУ-аас Японд суугаа Элчин сайд Кун Сюанью нь Токиогийн зүгээс Бээжингийн Өвлийн Олимпод бойкотзарласан тохиолдолд тун таагүй үр дагавар гарч болзошгүй талаар анхааруулсан байна. Тэрээр Японыг болгоомжтой байж, тийм аюултай алхам хийхгүй байхыг уриалжээ.
Кун Сюанью энэ талаар хийсэн мэдэгдэлдээ “Харамсалтай нь Японд зарим хүмүүс өөрсдийн өрөөсгөл үзэл бодлоос үүдэн Хятадын улс төрийн тогтолцоо руу халдаж, Шинжаан ба Хонконг дах хүний эрхийн талаарх цуурхал, худал мэдээ тарааж, Бээжингийн тоглолтод дипломат бойкот зарлахыг уриалж байна” гэжээ.
АНУ нь Бээжингийн олимпын эсрэг дипломат бойкотзарлаж байгаагаа хоёр долоо хоногийн өмнө зарласан. Удалгүй Их Британи, Австрали, Канад, Шинэ Зеландгэсэн улсууд АНУ-ын даган Бээжингийн тоглолтод дипломат бойкот зарлаж байгаагаа мэдэгдсэн байна.
Японы зүгээс бойкот зарласан тохиолдолд Хятадын тал ямаршуу хариу арга хэмжээ авахыг тааж ядах зүйлгүй. Юуны өмнө Японы хувьд БНХАУ нь хамгийн том худалдааны түнш, бараа бүтээгдэхүүн ба сэлбэг хэрэгслийн хамгийн чухал импортлогч юм. Түүнчлэн БНХАУ нь Япон руу айлчилдаг жуулчдын тоогоор олон жилийн турш тэргүүлж байгаа улс. Ялангуяа авто машины сэлбэг ба электрон эд ангийн арилжаан дээр Японы хамаарал хамгийн их мэдэрдэгддэг. Жишээлбэл, 2019 оны байдлаар Японыг чиглэсэн машины сэлбэгийн импортын 37 хувь нь Хятадаас ирж байсан. Цаашлаад, Хятад нь АНУ ба Японы өөрсдийнх нь дараа дэлхийд гуравдугаарт ордог япон машины худалдан авагч. Үүгээр зогсохгүй Японд үйлдвэрлэсэн электрон эд ангийн экспортын 35 хувь нь Хятадад ногддог.
Хятад нь улс төрийн дарамт шахалтад орсон тохиолдолд тохиролцохыг хүсэхгүй байгаа улсын эсрэг худалдааны хориг тавих туршлага нэлээд хуримтлуулсан гэж болно. Австрали нь Шинжаан дах хүний эрхийн асуудлаар Хятадыг удаа дараалан шүүмжилж, янз бүрийн хориг арга хэмжээ авсны дараа Австралиас нүүрс, хонины мах, төмрийн хүдэр гэх мэт барааны импортыг бүрэн зогсоосон нь Австралийн эдийн засагт тун таагүй туссан.
Японы зүгээс бойкот зарлавал ирэх хамгийн эмзэг хариу арга хэмжээ газрын ховор элементүүдтэй холбоотой юм. Америкийн судлаачдын гаргасан мэдээгээр Хятад нь дэлхийн ховор элементийн нөөцийг 36 хувийг агуулдаг ч олборлолт, боловсруулалт ба нийлүүлэлтийн 97 хувийг дангаар хангадаг. Япон нь электрон ба өндөр технологийн бараа бүтээгдэхүүний дэлхийн томоохон үйлдвэрлэгчийн хувьд газрын ховор элементийн хамгийн том хэрэглэгч. Гэхдээ Японд өөрийн гэсэн газрын ховор элементийн орд газар үгүй учраас шаардлагатай бүгдийг Хятадаас худалдан авдаг. Иймд Бээжингийн олимпод бойкотзарласны хариуг газрын ховор элементийн экспортыг хязгаарлах чиглэлээр авах нь Японд хамгийн хүндээр тусах юм. Тэгээд ч өмнө нь улс төрийн зөрчлийн улмаас Бээжин газрын ховор элементийн экспортоо хязгаарлахад Япон нэлээд хүнд байдалд орж байсан жишээ бий.
Сэтгэгдэл (0)
Сэтгэгдэл бичигдээгүй байна