АМГТГ, ШӨХТГ, Мэргэжлийн хяналт ерөнхий газрынханг шатахуунд шалгалт хийж нээлттэй мэдээллэхийг шаардаж байна

Жолооч нарын зүгээс шатахууны чанар муу, хурдан дуусч байна, гол асуудал нь шатахуунаас болж машины эд, ангид доголдол үүсч байна гэх шүүмжлэлийг өрнүүлээд байгаа юм. 

Олон нийтийн дунд шүүмжлэл өрнөх зуур бид ШӨХТГ-аас уг асуудалд шалгалт хийж байгаа эсэхийг тодруулахад ШӨХТГ-аас "Хуулийн хүрээндээ шатахуунд шалгалтыг МХЕГ, АМГТГ-аас хийх ёстой. Өмнө нь бид шалгалт хийж байхад олон зөрчил дутагдал илэрч байсан. Тодруулбал, манайд борлуулагдаж буй шатахуунд керосин, нафта гэсэн бодисууд хольж борлуулдаг байж болзошгүй "гэв.

Чиг үүргийнхээ хүрээнд шатахуунд шалгалт хийх ёстой АМГТГ-ын дэд даргаас бид энэ асуудлаар өнгөрөгч Даваа гаригаас эхлэн тодруулав. АМГТГ-аас ярихдаа "15 шатахуун түгээх станцийн шатахуунд санамсаргүй түүврийн аргаар шалгалт хийж дээж аваад АМГТГ-ынхаа лабораторит шинжилж байна. Хариу нь тун удахгүй гарна, МХЕГ-тай хамтарсан баг гарч уг асуудалд шалгалт хийнэ" гэсээр долоо хоног дуусав.

Харин уг асуудлаар МХЕГ-аас хил, гаалиар орж ирэхэд нь ямар шалгалт хийдэг, борлуулагдаж буй шатахуунд хяналт, шалгалт хийдэг эсэх тус байгууллагаас ямар чиг үүрэгтэй ажилладаг талаар тодруулахад "Шатахуун хариуцдаг хүн маань коронавирус тусаад өөр мэдэх хүн байхгүй" гэв. АМГТГ-ынхантай хамтарсан баг гарсан эсэхийг тодруулахад "Тийм зүйл одоогоор дуулаагүй, хариуцсан хүн нь өвчтэй байгаа гэж хэлсэн шүү дээ, дараа яриарай" гэх тайлбарыг өгсөн юм.

Шатахуун хэрэглэгчдийн эрх ашгийг хамгаалах холбооны УЗ-ийн дарга Б.Сайнбаяр: Баян-Өлгий, Ховдын боомтоор гарал үүсэл нь тодорхойгүй шатахуун ачсан машинууд орж ирж байна. Тухайн шатахуунаа орон нутагтаа борлуулахгүй Улаанбаатар хот руу зөөвөрлөж байгаа нь шатахууны чанарт нөлөөлж байна. Бид ГЕГ-аас хамгийн сүүлд авсан мэдээллээр энэ онд шатахуунд хольдог гэх нафта хилээр огт орж ирээгүй. Тиймээс керосин, нафта холих боломжгүй. Гол асуудал нь гарал үүсэл нь тодорхойгүй шатахууныг гадны улсуудаас оруулж ирж байна" гэв.

Шатахууны чанарын асуудал олон нийтийн дунд шүүмжлэл дагуулаад хэдэн долоо хонож байхад уг асуудалд хаанаас хяналт тавьж, шалгалт хийж, хариуцлага тооцох нь тодорхойгүй байна.

  МХЕГ ийм асуудал гарсанг сонсоогүй мэт үл тоох. Харин АМГТГ-ынхан өнгөрсөн Даваа гаригаас эхэлж шалгаад, лабораторитоо шинжлээд ч үр дүнд хүрээгүй, шатахуунд хийсэн шалгалтын хариу нь нууц байгаа юм.

АМГТГ, ШӨХТГ, МХЕГ-ынхан хариуцсан ажлаа хийж, асуудал дагуулаад буй шатахуунд шалгалт хийж,  олон нийтэд нээлттэй мэдээллэхийг шаардаж байна.