Дархан: Сар шинийн баярыг гэр бүлийн хүрээнд цомхон тэмдэглэхийг уриалав

Коронавируст халдварын тохиолдол эрс нэмэгдэж буйтай холбогдуулан өнөөдөр /2022.01.11/ Дархан-Уул аймгийн Онцгой комисс хуралджээ. 

Хурлын шийдвэрийг аймгийн Засаг дарга Б.Азжаргал иргэдэд танилцуулж, аж ахуйн нэгж байгууллага, иргэдийн бизнесийн үндсэн үйл ажиллагааг аль болох хязгаарлахгүй, эдийн засагт сөрөг нөлөө үзүүлэхгүй байх тал дээр анхаарч ажиллана гэдгийг онцлов. 

Тус хурлаас аймгийн хэмжээнд ААНБ, иргэдийг дараах ГУРВАН ШИЙДВЭРИЙГ дагаж мөрдөхийг чиглэл болгожээ. Үүнд: 
1. Энэ сарын 15-ны өдрөөс эхлэн олон нийтийг хамарсан бүх төрлийн тэмцээн, уралдааныг тодорхойгүй хугацаагаар хязгаарлажээ. 
2. Төрийн байгууллагууд тодорхойгүй хугацаагаар нийтийг хамарсан хурал, зөвлөгөөн, сургалт зохион байгуулахгүй байхаар болов. 
3. Сар шинийн баяраар төр, хувийн хэвшлийн байгууллагууд, нутгийн зөвлөлүүд нийтийг хамарсан нэгдсэн золголт хийхгүй юм. Харин нийт иргэдийг гэр бүлийн хүрээнд цомхон тэмдэглэхийг аймгийн Онцгой комиссоос уриалжээ. 

Коронавируст халдварын тохиолдол нэмэгдсэнтэй холбогдуулан сайн дурын шинжилгээний цэгийг нэмэлтээр ажиллуулахаар болсон байна.