Хүн, амьтны хатуу ба шингэн хаягдал, ургамлын үлдэгдэл, ахуйн ба үйлдвэрийн бохир ус зэрэг нь хөрсийг бохирдуулагч эх үүсвэр болдог. Жил бүрийн 5, 10 дугаар саруудад Улаанбаатар хотын эрчимтэй суурьшлын бүсэд хамаарах эдэлбэр газрын хөрсний тогтоосон 50 гаруй цэгээс дээж авч, шинжилгээ хийлгэж, хөрсний бохирдлын түвшинг тогтоодог.
Хөрсний бохирдлын талаар мэргэжилтнүүдийн хийсэн судалгаагаар хөрсний нянгын бохирдол нийслэл хотын дүүргүүдэд жил ирэх тусам нэмэгдэж байна. Жишээ нь, Улаанбаатар хотын хөрснөөс авсан нийт дээжний 1 хувь нь нянгын бохирдолгүй, 88 хувь нь бохирдолтой гардаг. Үүнээс 53 хувь нь бага зэргийн, 24 хувь нь дунд зэргийн, 11 хувь нь их зэрэглэлийн нянгын бохирдолтой. Ялангуяа нийслэлд гэр хороолол, томоохон худалдааны төв, захууд, хур хогын цэг орчмын хөрсөнд нянгын бохирдол их байна.
Өнгөрөгч онд нийслэлийн 9 дүүрэгт гэдэсний халдвараар өвчилсөн 1200 иргэнийг нянгын халдвартай ямар хамаарал холбоотойг судалж үзэхэд ихэвчлэн 0-4 хүртлэх насны хүүхдүүд гэдэсний халдварт өвчнөөр өвчилж байна. Үүнд хөрсний бохирдол хоёр хувиар нөлөөлж байна гэсэн дүн гарсан.
Судалгааны дүнгээр гэр хорооллын хөрсний ариун цэврийн түвшин муу, иргэдийн дунд гэдэсний халдварт өвчин гарах эрсдэл өндөр байгааг харуулж байна. Бохирдлын эх үүсвэр нь нүхэн жорлон, ил бие засах, жорлонгийн бохир ус халих зэрэг явдал болж байна.
Сэтгэгдэл (0)
Сэтгэгдэл бичигдээгүй байна