УИХ-ын чуулганы хуралдаан эхэллээ. Хуралдааны эхэнд Хүнсний хангамж аюулгүй байдлын талаар Ерөнхийлөгч У.Хүрэлсүх мэдээлэл хийв.
Тэрбээр “ Улс орны нийгэм эдийн засгийн аюулгүй байдлыг хангах зорилгоор халамжаас хөдөлмөрт, олборлолтоос боловсруулалт, импортоос экспортод шилжих суурь реформийн хүрээнд 100 жил 10 зорилт хөгжлийн санаачлагыг төрийн тэргүүн дэвшүүлсэн. Энэхүү зорилт нь Монгол Улсын Засгийн газрын “Шинэ сэргэлтийн бодлого”-д тусгалаа олсон нь сайшаалтай. Дээрх 10 зорилтын нэг болох хүнсний аюулгүй байдлыг хангах, хүнсний бүтээгдэхүүнээ дотоодийн хэрэгцээгээ бүрэн хангаж, мал аж ахуй, газар тариалангаа эрчимжүүлэн хөгжүүлэх, бүс нутагтаа органик хүнс экспортлогч орон болох зорилтыг хэрэгжүүлэхэд та бүхний анхаарлыг хандуулахаар чуулганд би биечлэн оролцож байна.
Төрийн бодлогын цөм нь Монгол хүн, Монгол өрх байж ирсэн. Цаашид ч байх ёстой. Монгол Улсын Үндэсний аюулгүй байдал нь Монгол хүний аюулгүй байдалтай шууд холбоотой. Хүнээ хамгаалж, хөгжүүлье гэвэл хүнсээ бид сайжруулах ёстой. Монгол хүний эрүүл аюулгүй амьдрах таатай орчин нөхцлийг бүрдүүлэх суурь асуудлын нэг бол хүнсний аюулгүй байдлыг хангах, хүнсний хангамжийг нэмэгдүүлэх явдал юм.
Манай улс хүсний бүтээгдэхүүнийхээ 50 хувийг гаднаас авч байна. Өнгөрсөн онд нэг тэрбум ам.долларын хүнсний бүтээгдэхүүнийг гаднаас авсан. Үүнд гурилан бүтээгдэхүүний 33, сүү, сүүн бүтээгдэхүүний 40 орчим, өндөгний 50 орчим хувь, загас, будаа, ургамлын тос, тахианы мах, хүнсний давсаа хүртэл 100 хувь гаднаас авч байна. Аль юм болгон давсаа хүртэл айлаас гуйж амьдрах юм бэ" гэв.
Сэтгэгдэл (0)
Сэтгэгдэл бичигдээгүй байна