Богдхан уулын Баруун ширээт, Зүүн ширээт рүү гарах замд Дугуй цагаан орчимд байрласан шавар гэрүүд олон жилийн нар салхинд гандаж гундаж, өнгө үзэмжгүй болсон гэх шалтгаанаар нийслэлийн Засаг даргын захирамжаар албадан буулгасан. Ингэхдээ тус газарт үйл ажиллагаа явуулж байсан Богдхан амралтын баазад урьдчилан мэдэгдэлгүйгээр албадан буулгасан асуудлаар шүүхэд хандаад байгаа билээ. Монгол Улсын Үндсэн хуульд "Бусдын өмчийг хамгаална" гэж заасан атал төрийн байгууллага нь ийн хандсанд шүүмжлэлтэй хандаж буй.
Тиймээс уг асуудлын хүрээнд БОАЖ-ын сайд Б.Бат-Эрдэнээс зарим зүйлийг тодрууллаа.
Тэрбээр "Газрын эрхийг цуцалсан гэж ойлгоогүй. Тухайн шавар гэрүүдийг нураасан гэж ойлгосон. Анх 2016 оны зургадугаар сард таван жилийн хугацаатай тухайн газар олгогдсон. 2021 оны зургадугаар сард газрын эрх нь дууссан. Гэтэл 2019 оны долдугаар сарын 10-ны өдөр газрын эрхийг цуцалсан байдаг. Үүний дараа шүүхийн процесс өрнөж 2021 оны нэг сард шүүхээс газар цуцалсан тушаалыг хэрэгсэхгүй болгоод газрын эрхийг сэргээсэн.
Ер нь бол хоёр асуудал байгаа. Нэг нь газрын асуудал. Нөгөө нь газар дээр баригдсан үл хөдлөх хөрөнгө бүртгэлжсэн үү гэдэг асуудал. Тухайн хүний хувийн өмчийн асуудал яригдаад байна. Ер нь бол Богдхан ууланд аялал жуулчлалын чиглэлээр үйл ажиллагаа явуулж байгаа ААН-ийг тоолоод үзэхээр гарын таван хуруунд багтахаар байгаа, бусад нь бүгд хаус. Нүхт, Хүүш, Арцатын амууд хаус болоод барилгажсан. Зайсанд байгаа аялал жуулчлалын гэдэг зориулалттай газар дээр шавар гэр нь өнгө үзэмж муутай байсан нь үнэн. Тухайн компанийн менежментийн асуудал. Энэ нь тухайн гэрийг нураах үндэслэл биш.
Бид жишээ нь НЗДТГ-т хандан дунд голын дагуу усны хамгаалалтын бүс дээр усан парк барина гээд парк барьчихлаа. Үүнийг зогсоогооч гэсэн бичиг өгсөн. Өнөөдрийг хүртэл хариу алга. Хоёр давхарт байхад нь хандсан өнөөдөр барилга зургаан давхартаа хүрчихсэн байна.
Энэ асуудлыг сууриар нь өөрчлөх хэрэгтэй. БОАЖЯ-нд газрын эрх хүсэхдээ аялал жуулчлалын түр отоглох газар гэж хүсдэг. Бид эрх олгодог. Гэтэл тэр эрхээ нийслэлийн ерөнхий төлөвлөгөөний газарт очоод зургаа өөрчлөөд 16, 19 давхар байшин болгоод хувиргадаг. Эргээд бид шаардлага тавиад очихоор танай нийслэл баталж өгсөн шүү дээ. Нийслэлийн ерөнхий төлөвлөгөөний баталсан “А даалгавар” бүх бичиг бидэнд байна гэдэг.
Нураах эрх шүүхийн шийдвэр дээр л бий болох ёстой. Шүүхийн шийдвэр гараад, шийдвэр гүйцэтгэлийн ажилтан ирээд хаалга үүдийг нь лацдаад явуул явна. Тэрнээс биш аль нэг ААН-ийн газар, хөрөнгөнд шүүхийн шийдвэргүй халдах ямар ч боломжгүй. Өнөөдөр хууль ийм л байгаа" гэв.
Сэтгэгдэл (0)
Сэтгэгдэл бичигдээгүй байна