Шинэ дулааны цахилгаан станцын нээлтийн ёслол боллоо

Монгол Улсын Засгийн газрын Шинэ сэргэлтийн бодлогын хүрээнд хэрэгжиж буй Эрчим хүчний сэргэлтийн томоохон бүтээн байгуулалтын нэг болох “Дорнод бүсийн эрчим хүчний систем” ТӨХК-ийн 50МВт өргөтгөлийн нээлт өнөөдөр болж байна.

Нээлтийн ёслолд Монгол Улсын Ерөнхийлөгч У.Хүрэлсүх, Улсын Их Хурлын гишүүн, Засгийн газрын гишүүн, Эрчим хүчний сайд Б.Чойжилсүрэн, Зам, тээврийн хөгжлийн дэд сайд Л.Халтар, Зүүн бүсийн зөвлөлийн дарга, Дорнод аймгийн Засаг дарга М.Бадамсүрэн болон төслийн гүйцэтгэгч “TBEA” компанийн төлөөлөл, хүндэт зочид төлөөлөгчид "ДБЭХС" ТӨХК-ийн алба хаагчид оролцов.

Түүхэнд тэмдэглэгдэн үлдэх энэхүү 50 мВт өргөтгөл нь ашиглалтад орсноор Дорнод, Сүхбаатар аймгийн 36 сум, суурин газрын 25 мянга орчим өрх, 3,100 гаруй аж ахуйн нэгж, албан байгууллага, уул уурхайн 13 ордын баяжуулах, олборлох үйлдвэрийг цахилгаан эрчим хүчээр, Чойбалсан хотын 800 гаруй аж ахуйн нэгж, 6,000 гаруй өрхийг дулааны эрчим хүчээр хангах юм.

Түүнчлэн Цахилгаан эрчим хүчний боловсруулалт 300 сая КВТ цагаар буюу 130 хувиар, дулааны эрчим хүч боловсруулалт 100 гкал цаг буюу одоогийн байгаа хүчин чадлаас хоёр дахин нэмэгдэнэ.