ЯПОНЧУУД ЖИВХИЙГ ДАХИН БОЛОВСРУУЛЖ БАЙНА

Японы эдийн засагт заналхийлж буй гол дайсан нь хүн амын насжилт. Тус улсын иргэдийн дөрөвний нэг нь 65-аас дээш насныхан юм. Энэ нь ажил эрхлэх насны иргэдийн тоо багасч, тэтгэвэр авагчид нэмэгдэж байгаа гэсэн үг. Тиймдээ ч том хүний живхний хэрэглээ хүүхдийнхээс илүү байдаг ажээ.

Саяхан Тоттори хотод төвтэй "Super Faiths" компани хэрэглэсэн живхийг дахин боловсруулж, цэвэр түлш гаргаж авчээ. Тэд живхийг ариутгаж, нунтаглаж хатаагаад үрлэн хэлбэртэй түлш болгож хувиргасан байна. Эдгээр жижиг үрлүүд нь хуурай, үнэргүй бөгөөд кг тутам нь 5000 ккал дулаан ялгаруулдаг тул эрчим хүч, дулааны системд ашиглах боломжтой. Японд 2011 оны цунами, газар хөдлөлт, Фукушимагийн цөмийн станцын ослоос шалтгаалан эрчим хүчний ухаалаг шийдэл олох шаардлага тулгарч байгаа юм.