МӨСӨН ДЭЭР ТОГЛОЖ БАЙГААД УСАНД ОСОЛДСОН ХҮҮГ ГУРАВ ХОНОГ ХАЙЖ БАЙНА

Мөсөн дээр тоглож байгаад харзны усанд осолдсон долоо настай хүүг Ховд аймгийн Онцгой байдлын газрын аврагчид эрэн хайж байна.

Тус аймгийн Булган сумын Баянгол багийн "Хагшаал" гэдэг газар /сумын төвөөс хойд зүгт 17 км-т/ малчин Б-гийн долоон настай хүү Б гурав хоногийн өмнө буюу нэгдүгээр сарын 14-ний өдрийн 13:00 цагт "Булган" голын мөсөн дээр тоглож байгаад харзны усанд унаж, осолдсон байна. Ослын дуудлагыг тухайн өдрийн 19:15 цагт хүлээн авч тус аймгийн Онцгой байдлын газрын 29 алба хаагч, тус сум дахь Цагдаагийн хэлтсийн 8 алба хаагч, орон нутгийн 27 хүн, нийт 64 хүн, 7 автомашинтай 14-ний өдрөөс эрэн хайх ажиллагааг ''Булган'' гол дагуу зохион байгуулж байна.

Нэгдүгээр сарын 16-ны өдрийн байдлаар 32 цооног гаргаж, гурван усчин зургаан удаагийн шумбалт хийхэд үр дүнд хүрээгүй тул өнөөдөр эрэн хайх ажиллагааг дахин үргэлжлүүлэхээр болсон.