СУПЕРМАРКЕТУУД ОНЛАЙН ХУДАЛДААНД ШАХАГДАЖ ЭХЭЛЛЭЭ

Хоёр сарын турш тэмцсэний эцэст хятадын жижиглэн худалдааны томоохон сүлжээ AEON Гуанжоу дахь салбараасаа эхлэн хаалгаа барьж эхэллээ. Тус улсад онлайн худалдаа үсрэнгүй хөгжиж байгаа учраас супермаркетууд бизнесээс шахагдаж байна.

Хятадын жижиглэн худалдааны зах зээл өөрийн гэсэн онцлогтой. Дотоодын супермаркетуудаас импортын бүтээгдэхүүн олж авах хэцүү, байгаа нь үнэтэй эсвэл удаан хадгалсан байдаг. Зарим нэг импортын онцгой бүтээгдэхүүн худалдан авах шаардлага гарсан хэрэглэгчид онлайн худалдааг сонгох нь илүү дөхөм. Одоогийн байдалаар хятадын жижиглэн худалдааны зах зээлд Like 7-Eleven, Circle K, Family Mart зэрэг түргэн хоол, ахуйн чанартай гарын дор, яаралтай хэрэгтэй бүтээгдэхүүнүүдийг худалдаалдаг жижиг супер маркетууд, AEON, Vanguard, Walmart зэрэг томоохон супер маркетууд үйл ажиллагаа явуулж байна. Ерөнхийдөө бараа бүтээгдэхүүн нь бүгд адил учраас тус сүлжээ дэлгүүрүүд онлайн худалдаанд шахагдаж эхэлж байна. Харин үүнтэй зэрэгцээд ашигтай болж байгаа сүлжээ дэлгүүр нь зөвхөн импортын бүтээгдэхүүн зардаг дэлгүүрүүд болоод байна. Эдгээр дэлгүүрүүд татваргүй бүсэд байршиж, бараа бүтээгдэхүүнээ харьцангуй доогуур үнээр худалдах боломжтой. Ингэж чадаж гэмээнэ импортын бүтээгдэхүүн хэрэглэх сонирхол нь нэмэгдэж байгаа Хятад улсад оршин тогтнож чадах юм.