АНУ ХОЙД СОЛОНГОСТОЙ ДАЙТАХ ТӨЛӨВЛӨГӨӨГӨӨ ЗАРЛАВ

АНУ-ын Батлан хамгаалахын сайд Жеймс Мэттис Вашингтонд Хойд Солонгостой хийх дайны төлөвлөгөө бий гэж мэдэгдсэн байна. Ванкуверт хэд хэдэн орны Гадаад хэргийн сайд нар оролцсон Солонгосын хойгийн нөхцөл байдлын талаарх уулзалт эхлэхээс өмнөх оройн хоолны үеэр тэрбээр энэ талаар ярьсныг пүрэв гаригт "Kyodo" мэдээллийн агентлаг мэдээлж, ТАСС уламжлав.

БНАСАУ цөмийн болон пуужингийн хөтөлбөр хэрэгжүүлж буйд АНУ ямар байр суурьтай байгаа талаархи асуултад Мэттис "АНУ бэлэн байна, бидэнд дайны төлөвлөгөө бий" хэмээн хариулжээ. Үүний зэрэгцээ Пентагоны тэргүүн дипломат хүчин чармайлтад үндэслэн асуудлыг энх тайвнаар шийдэхэд тэргүүлэх ач холбогдол өгдөг хэмээсэн байна.

Оройн хоолны үеэр, ялангуяа АНУ-ын Төрийн нарийн бичгийн дарга Рекс Тиллерсон, Японы Гадаад хэргийн сайд Таро Коно болон бусад сайд нар Пхеньянд дарамт шахалт үзүүлэх бодлогоо өөрчлөхийг шаарджээ. Энэ сарын 16-ны өдөр Ванкуверт болсон уулзалтад 1950-1953 оны Солонгосын дайны үеэр АНУ-ыг дэмжсэн 20 орны сайд оролцсон байна