Хоёр Солонгосын төрийн тэргүүн нарын уулзалтаас хүлээж буй олон эерэг хүлээлтийн нэг бол Хойд Солонгосын цөмийн зэвсгийн асуудал юм. Уг асуудалд нааштай хариулт авч чадвал уулзалтын үр дүн тун өгөөжтэй болсонд тооцогдох байв. Гэтэл хүлээлт өндөртэй байсан энэ асуудалд Хойд Солонгосын удирдагч Ким Жон Ун пуужингийн туршилтаа зогсоож, цөмийн зэвсгийн туршилтын баазаа хаах шийдвэр гаргасан талаараа мэдэгдсэн нь тун сонирхолтой үйл явдал байв. Хойд Солонгосын Мэдээллийн төв агентлагийн мэдээлснээр тус улс дөрөвдүгээр сарын 21-нээс эхлэн цөмийн зэвсгийн болон тив алгасах баллистик пуужингийн туршилтаа зогсоож байгаа нь Солонгосын хойгийн эдийн засгийн өсөлт, энх тайван, тогтвортой байдлын төлөө хийж буй том алхамд тооцогдож байгаа юм. Магадгүй хоёр улсын төрийн тэргүүний уулазлтаас Өмнөд, Хойд Солонгос нэгдэх хэмжээний эерэг үр дүн гарахыг үгүйсгэхгүй хэмээн ажиглагчид онцолжээ.
Ким Жон Ун ирэх долоо хоногийн баасан гаригт БНСУ-ын Ерөнхийлөгч Мүн Жэ Интэй уулзах юм. Өнгөрсөн баасан гарагт хоёр Солонгосын төрийн тэргүүнүүд анх удаа утсаар холбогдож ярилцсан бөгөөд 4 минут үргэлжилсэн тэдний яриа амжилттай болсон талаар Өмнөд Солонгосын албаны хүмүүс онцолжээ. Түүнчлэн Хойд Солонгосын удирдагч Ким Жон Ун, АНУ-ын Ерөнхийлөгч Доналд Трамп нар ирэх зургаадугаар сараас өмнө уулзахаар төлөвлөөд байгаа юм. Уулзалт товлосон ёсоор болж өнгөрвөл энэ нь АНУ болон Хойд Солонгосын төрийн тэргүүнүүд уулзсан хамгийн анхны тохиолдол болж түүхэнд тэмдэглэгдэх юм.
Мөн Хойд Солонгосын удирдагч Ким Жон Уны цөмийн зэвсгээсээ татгалзаж буй шийдвэрийг АНУ-ын ерөнхийлөгч Доналд Трамп "Энэ бол Хойд Солонгос төдийгүй Дэлхийн бусад улс орнуудын хувьд маш сайн мэдээ байна. Маш том дэвшил" хэмээн өөрийн твиттер хуудаснаа жиргэжээ.
Сэтгэгдэл (0)
Сэтгэгдэл бичигдээгүй байна