ӨГИЙНУУР СУМЫНХАН ЕРӨНХИЙ САЙДАД ӨРГӨХ БИЧИГ ИЛГЭЭЖЭЭ

Архангай аймгийн Өгийнуур суманд малын гоц халдварт хонины цэцэг өвчин гарч хорио цээрийн дэглэм тогтоож өнгөрсөн онд тус сумын 71 малчин өрх 2459 хонио устгуулсан билээ.

Мөн 2018 оны 3 сарын 2-нд мал амьтны гоц халдварт шүлхий өвчин үхэрт гарч хорио цээрийн дэглэм тогтоосон. Гэтэл хорио цээрийн дэглэм тогтоосон гэх боловч өвчин улам даамжирч газар авч одоо хонинд халдварлаад байна. Энэ жил өвөл хавартаа цаг хатуу орж мал өл алдахын зэрэгцээ шүлхий өвчинд нэрвэгдэн олноор хорогдсон юм.

Малчид иргэд сэтгэл санааны болон эд хөрөнгийн ихээхэн хохирол амссан энэ үед тойргоос сонгогдсон УИХ-ын гишүүд болон Аймгийн удирдлагууд ирж орон нутагт болж байгаа хүндрэл бэрхшээлтэй танилцаж малчдад сэтгэл санааны дэм өгөх байх гэж горьдлого тээн мөн ч их харсан боловч харамсалтай нь үзэгдээгүй.
Өгийнуур сумын засаг дарга Л.Алтангэрэл өнгөрсөн 03 сарын 28-нд хувийн өргөдлөө өгч ажлаасаа чөлөөлөгдөн гадаад орон яваад сураг тасарчээ.

Сумын ИТХ өнгөрсөн дөрөвдүгээр сард хуралдаж, дахин Засаг даргаа сонгосон боловч өнөөдрийг хүртэл Засаг даргагүй, сумын төр захиргааны байгууллага нь удирдлагагүй явж ирлээ.

Хариуцах эзэнгүй хариуцлага тооцох удирдлагагүй байсны улмаас энэ өвчин өнөөдрийг хүртэл намжих нь битгий хэл газар авч тархсан гэж бид үзэж байна. Ийм эзэнгүй төрийн эмгэнэл энэ нутагт нүүрлээд удаж байна.

Одоо зэргэлдээ Хашаат, Хотонт, Төвшрүүлэх, Батцэнгэл, Цэнхэр сумдад энэ өвчин гарч эхэлсэн.Энэ хавар, зундаа бороо орохгүй байгаагийн улмаас өвс ногоо ургаагүй ган болж одоогоороо мал өргүүлээсээ гарахгүй байна. Иймд малчид бид зэргэлдээ сумаар отор нүүдэл хийх, өөр аймгийн нутаг дэвсгэрт очиж отор нүүдлээр явах аргагүй болсон.
Тойрсон бүх сумдад хорио цээрийн дэглэм тогтоосон учир тухайн сумдын нутаг дэвсгэрээрээ дайран өнгөрөх нь битгий хэл бензин шатахуун авах, хоол хүнсээ залгуулахаар ороход хөөж туугаад оруулахгүй болсон.

Аймаг орон нутгийн удирдлагууд өдий болтол анхаарал хандуулахгүй байгаа тул аргагүй эрхэнд Ерөнхий сайд У.Хүрэлсүхэд хандаж, өргөх бичиг илгээжээ.

Малчидын мал 3 жил дараалан малын халдварт өвчинд нэрвэгдэж амьжиргааны эх үүсвэр болсон таван малаасаа салж сэтгэл санааны болон эд материалын ихээхэн хохирол амсаж байгаа гэнэ.

Иймд Ерөнхий сайдыг энэ суманд үүссэн нөхцөл байдлыг үнэлж дүгнээд яаралтай төрийн ажлыг царгалдуулалгүй авч явах эзэнтэй болгуулах, малын гоц халдварт өвчнийг богино хугацаанд намжаах зэрэг тулгамдсан асуудлуудыг түргэн шуурхай шийдвэрлүүлж өгөхийг сумын иргэд хүсчээ.