ЯАРМАГИЙН ГҮҮР БҮРЭН ЗАСВАРЛАГДАЖ ДУУССАНААР ЗАМЫН ТҮГЖРЭЛ 50-60 ХУВЬ БУУРНА

Яармагийн шинэ гүүр барих, хуучин гүүрийг засварлах төслийг Хятадын засгийн газрын 30 сая долларын хөнгөлөлттэй зээлээр барьж байгаа билээ. Тэгвэл энэ сарын 9-ны өдөр шинэ гүүрний зорчих хэсгийг нээж, хуучин гүүрийг хаасан юм.

Энэ талаар нийслэлийн авто замын хөгжлийн газрын хэвлэлийн төлөөлөгч О.Батбаяраас тодруулахад "Яармагийн гүүрний зөвхөн зорчих хэсэг буюу хоёр талдаа хоёр эгнээтэй зам л ашиглалтад орсон. Шинэ гүүр 250.2 урттай, 20.5 метр өргөн, дөрвөн эгнээтэй. Хуучин гүүртэйгээ нийлээд зургаан эгнээтэй болох юм. Хуучин гүүрний засварын ажил эхлээд 18 хонож байна. Яармагийн гүүрэн зам доогуурх тунель гарц, болон уулын замуудыг холбосон замууд 2019 онд ашиглалтад орно" гэлээ.

Тус гүүр нь ашиглалтад орсноор Яармагийн гүүр орчмын олон замын уулзварт зам, удахгүй ашиглалтад орох Хөшгийн хөндийн олон улсын нисэх онгоцны буудал, "Буянт-Ухаа-1, 2" хороолол зэргийг хотын төвтэй холбох гол гарц юм. Гүүрээр өдөрт 20-30 мянган машин нэвтэрч, хуучин гүүрнээс гурав дахин их ачааллыг даах чадвартай аж.

Шинэ гүүр ашиглалтад орсноор Яармагийн гүүрний орчмын замын түгжрэл 50-60 хувь буурах боломжтой гэж албаны хүмүүс үзэж байна. Яармагийн хуучин гүүр нь 1960 оноос хойш шинэчлэгдээгүй учраас засварлах шаардлагатай байгаа билээ. Ингээд гүүрэн байгууламжийг бүтнээр нь 2019 оны нэгдүгээр улиралд ашиглалтад оруулахаар төлөвлөжээ.