ИРЦ ХҮРЭЭГҮЙГЭЭС УИХ-ЫН ӨНӨӨДРИЙН ХУРАЛДААНЫГ ХААЛАА

УИХ-ын энэ оны хамгийн сүүлийн хуралдаан өнөөдөр 10.00 цагт товлогдоод байсан ч ирц хүрээгүйгээс хаалаа. Чуулганы хуралдаанд 68 гишүүн хүрэлцэн ирэхээс 11.00 цагийн байдлаар 35 гишүүн ирсэн байв. Гишүүдийн ирц 50 хувьд хүрээгүй учраас УИХ-ын дэд дарга Л.Энх-Амгалан өнөөдрийн хуралдааныг хаасныг мэдэгдлээ.

УИХ-ын нэр бүхий 38 гишүүн УИХ-ын дарга М.Энхболдыг огцрохыг шаардан бойкот зарласан. Тэд УИХ-ын даргыг огцрох хүртэл байнгын хороо, чуулганы хуралдаанд суухгүй гэж мэдэгдээд байгаа билээ. Уг үйл явдлаас үүдэн УИХ-ын үйл ажиллагаа дөрвөн долоо хоног гацаанд ороод байна. Тодруулбал, УИХ-ын чуулган долоо дахь удаагаа хуралдаж чадахгүй хаагдлаа.