Өчигдөр буюу энэ сарын 5-ны өдөр Эрүүгийн Цагдаагийн албаны Эдийн засагтай гэмт хэрэгтэй тэмцэх албанаас Худалдаа Хөгжлийн Банкны Худалдаа Хөгжлийн Банкны ТУЗ-ийн дарга Д.Эрдэнэбилэг, тус банкны гүйцэтгэх захирал О.Орхон, "Монголиан коппер корпорейшн" ХХК-ийн гүйцэтгэх захирал Ц.Пүрэвтүвшин нарыг албадан баривчиллагаа явуулж байцаалт авсан. Тэднийг байцааж дууссаны дараагаар АТГ руу авч явж тэндээ мөн байцаалт явуулсан байна.
Харин тэднийг өчигдөр орой яллагдагчаар тооцож улмаар ШШГЕГ-ын харьяа 461 дүгээр хорих ангид түр саатуулжээ.
Эрүүгийн цагдаагийн албанаас эдгээр сэжигтнүүдийг цагдан хорих хүсэлтийг Нийслэлийн Прокурорын газарт хүргүүлсэн байна. Өнөөдөр Д.Эрдэнэбилэг, О.Орхон, Ц.Пүрэвтүвшин нарыг цаашид цагдан хорьж шалгах эсэхийг шүүхээр шийдвэрлэх юм.
Мөн "Монголиан коппер корпорейшн" ХХК-ийн төлөөлөн удирдах зөвлөлийн дарга М.Мөнхбаатарыг өчигдөр гэрчийн мэдүүлэг өгүүлэхээр Эрүүгийн цагдаагийн албанд дуудаж байцаалт авсан. Тэгвэл түүнийг Эрүүгийн цагдаагийн албанаас цагдан хорих хүсэлтийг Нийслэлийн Прокурорын газарт хүргүүлж, хорих 461-р ангид мөн цагдан хорьсон байна.
Сэтгэгдэл (0)
Сэтгэгдэл бичигдээгүй байна