ҮХЦ-ийн гишүүдийн хоёрынх нь бүрэн эрхийн хугацаа ирэх сард дуусна

ҮХЦ-ийн есөн гишүүний хоёрынх нь бүрэн эрхийн хугацаа ирэх сард буюу 2019.12.26-нд дуусгавар болно. Тодруулбал, Улсын Дээд шүүхээс санал оруулан, томилогдсон Д.Солонго, Ш.Цогтоо нарын гишүүдийн бүрэн эрхийн хугацаа дуусах юм.

Харин асуудал дагуулж, ажлаа өгөхөөр мэдэгдээд байгаа ҮХЦ-ийн дарга Доржийн Одбаярыг 2016.11.17-ны өдөр УИХ-аас санал болгон томилсон бөгөөд түүний гишүүний бүрэн эрхийн хугацаа 2022.11.17-нд дуусгавар болно. Д.Одбаяр нь ҮХЦ-ийн даргын ажлаа өгөхөөр өргөдлөө гаргаад байгаа бөгөөд тэр ҮХЦ-ийн гишүүн хэвээр үлдэнэ гэсэн үг. Хэрэв тэр ёсзүйн хариуцлага үүрэхээр шийдвэр гаргасан бол гишүүнээсээ татгалзах хүсэлтээ УИХ-д гаргах ёстой байлаа.

Тэгвэл бусад гишүүд болох ҮХЦ-ийн гишүүн Гунгаагийн Баясгалан, Шилагарьдын Солонго нарыг УИХ-аас, Батсүхийн Буяндэлгэр, Цагааны Нанзаддорж, Гомбожавын Туулхүү нарыг Ерөнхийлөгчийн тамгын газраас санал болгон томилсон байна. Тэдний бүрэн эрхийн хугацаа 2024, 2025 онд дуусгавар болно. Улсын дээд шүүхээс санал орж, томилогдсон дараагийн гишүүн бол Намжилын Чинбат бөгөөд түүний бүрэн эрх 2023 онд дуусгавар болох юм. ҮХЦ-ийн гишүүд зургаан жилийн хугацаатай томилогдон, бүрэн эрхээ хэрэгжүүлдэг.