Өнөөдөр npopst.mn сайтад Тагнуулын ерөнхий газрын Тамгын газрын дарга Э.Эрдэнийн ярилцлага нийтлэгджээ. Тухайн ярилцлага нь ТЕГ-ын дарга, генерал Д.Гэрэлийн хувийн байдал болоод ажлын талаар өрнөжээ.
Тодруулбал,
“Та манай уншигчдад ТЕГ-ын дарга, бригадын генерал Д.Гэрэлийн талаар товч танилцуулаач?” гэсэн асуултад “Тагнуулын байгууллагын дарга, бригадын генерал Д.Гэрэл нь 1974 онд НАХЯ-д төлөөлөгчөөр томилогдож анх ажил амьдралын гараагаа эхлүүлсэн. Тэрээр системийн байгууллагуудад 40 гаруй жил үр бүтээлтэй ажиллаж, Монгол Улсын тусгаар тогтнол, ҮАБ-ыг хангах үйлсэд бага залуу наснаасаа өдгөөг хүртэл тасралтгүй ажиллаж байна. Дипломат албанд консулын газрын дарга, зөвлөх, элчин зөвлөх, элчин сайдаар тус тус ажиллаж байсан Онц бөгөөд бүрэн эрхт элчин сайд хүн юм. Үүний хажуугаар олон нийтийн байгууллага, сонгуульт ажлуудад идэвхтэй оролцдог хүн бөгөөд Монголын Таеквондогийн холбоо, самбын холбооны ерөнхийлөгчөөр тус тус ажиллаж байна” гэсэн байна.
Мөн Д.Гэрэл генерал болон сэтгүүлч Н.Өнөрцэцэг нарын маргааны талаарх асуултад хариулахдаа “Энэ асуудлын тухайд АТГ, ЦЕГ болон холбогдох байгууллагаас шалгаад ТЕГ-ын дарга Д.Гэрэл уг асуудалд холбогдолгүй тухай хариуг албан ёсоор өгсөн байгаа. Д.Гэрэл даргаас хэвлэл мэдээллийн хэрэгслээр иргэний нэр хүндэд халдсан асуудлаар тухайн хэвлэл мэдээллийн байгууллагыг хариуцагчаар татаж, иргэний журмаар шүүхэд асуудлыг тавьсан. Ингэснээр хариуцагч олон нийтэд тараасан мэдээллийнхээ үнэн зөвийг нотлох, олон нийтийг хоёр талын тэнцвэртэй мэдээллээр хангах боломж бүрдэх зэрэг ач холбогдолтой. Түүнчлэн зарим төрлийн хэрэг дээр шүүхээс шийдвэр гараагүй байхад хэргийн оролцогчид олон нийтэд хандан мэдээлэл өгөхгүй байх эрх зүйн зохицуулалт байдгийг ч анхаарах хэрэгтэй юм” гэжээ. Мөн “Д.Гэрэл даргын хүүгийн алтны лицензтэй холбоотой мэдээлэл цацагдсаны дараа Зариг.мн сайтыг та нөлөө бүхий цөөнгүй хүнээр дарамтлуулсан, мэдээллээ авахыг шаардсан, гуйсан, мөн сайтыг нь хаалгана гэсэн гэх мэдээлэл сошиалаар түгсээр байгаа” гэсэн асуултад “Тийм асуудал байгаа бол нотлох баримтаа гаргаж холбогдох байгууллагад нь хандах хэрэгтэй” гэсэн хариултыг өгчээ.
Сэтгэгдэл (0)
Сэтгэгдэл бичигдээгүй байна