Э.Бат-Үүл: Ерөнхийлөгчийн засаглалд шилжиж, Путины дэглэм шиг засаглал тогтох вий гэж хардаж байна

Улаанбаатар хотын дарга асан, АН-ын гишүүн Э.Бат-Үүл мэдэгдэл хийлээ. Энэ үеэрээ тэрбээр сэтгүүлчдийн асуултад хариуллаа.

Тэрбээр "Би нийслэлийнхээ  төлөө л ажиллана. Нийслэлийн намын даргад өрсөлдөнө. Ирээдүйд боломжтой бол Нийслэлийн Засаг даргад өрсөлдөнө. Намайг Ерөнхийлөгчийн сонгуульд өрсөлдөх гэж байгаа мэтээр мэдээлэл гараад байна, гүжирлэг гүтгэлэг явагдах эхлэл болж байна. Мөн саяхан Засгийн газрыг шинээр байгуулах явцад Хууль зүйн байнгын хорооны дарга С.Бямбацогт сонгуулийн дараа Үндсэн хуулийг дахин өөрчилье гэх ноцтой зүйлийг ярьсан. Үндсэн хуулийг жилийн өмнө өөрчлөхдөө  ойрын найман жилд дахин гар хүрэхгүй гэж ярьж байсан. Гэтэл УИХ  Үндсэн хуульд дахин хүрэх шаардлагатай  болж Ерөнхийлөгчийн сонгуулийн дараа Үндсэн хуулийг өөрчилнө гэсэн санааг хэллээ.. Би үүнийг Ерөнхийлөгчийн сонгуулийн дараа Ерөнхийлөгчийн засаглалд шилжих вий гэж хардаж байна. Учир нь бэлтгэлээ хангачихсан, парламентын бүх эрх мэдлийг Ерөнхий сайдад шилжүүлсэн. Тэгэхээр Ерөнхий сайдыг Ерөнхийлөгч томилно гэх л юм бол манайд Оросын Ерөнхийлөгч Путины дэглэм шиг Ерөнхийлөгчийн засаглал тогтоно" гэлээ.