Америкт суугаа элчин сайд Ё. Отгонбаяр эх орондоо буцах хүсэлт гаргажээ

АНУ-д суугаа элчин сайд Ё. Отгонбаярыг эгүүлэн татах санал 

Монгол улсын Ерөнхийлөгч Х. Баттулга гаргаж, УИХ энэ асуудлыг хэлэлцэж, эгүүлэн татахгүй хэмээн олныг саяхан шуугиулсан билээ. Харин ерөнхийлөгч элчин сайд Ё. Отгонбаярыг эгүүлэн татах тухай зарлиг гаргаснаар Гадаад харилцааны яам ажлаа тайлагнан хариуцдаг УИХ-ын шийдвэрийг дагах уу, Ерөнхийлөгчийн зарлигийг хэрэгжүүлэх үү гэсэн хэцүүхэн ацан шалаанд орсон юм. УИХ-ын зарим гишүүд Ерөнхийлөгчийн зарлиг хуульд нийцэхгүй байгаа талаар ярьж, энэ асуудал чамгүй маргаан дагуулах шинжтэй болоод байтал элчин сайд Ё. Отгонбаяр өөрийн хүсэлтээр буцах болсон тухай мэдээ чих дэлсэв. Гадаад яамны хэдэн танилуудтайгаа утас цохин ярьж байж, элчин сайд Ё. Отгонбаярын Б. Батцэцэг сайдын нэр дээр  илгээсэн хүсэлтийг олж үзлээ. 

Одоогийн энэ үүссэн нөхцөл байдал нь АНУ-Монголын харилцаанд сөрөг нөлөө үзүүлэх ёсгүй гэж элчин сайд зарчмын хувьд үзэж, засаглалын салаа мөчрүүд хоорондоо зөрөлдсөн шийдвэр гаргасан нь цаашид элчин сайдыг томилох, эгүүлэн татах асуудлаар буруу жишиг тогтож болзошгүй учир Ё. Отгонбаяр эх орондоо бүр мөсөн буцах хүсэлт гаргажээ.

Ё. Отгонбаяр хүсэлтдээ АНУ-д 3 жил ажиллахдаа хийсэн, бүтээсэн ажлуудаа дурдсан байх юм. Тэрбээр хоёр орны харилцааг Иж бүрэн түншлэлээс Өртгөсөн иж бүрэн түншлэл, Өртгөсөн иж бүрэн түншлэлээс Стратегийн түншлэлийн хэмжээнд тус тус хүргэснээ ажлын гол үр дүн гэж үзэж байгаа бололтой. Үнэхээр 2019 онд Монгол улсын Ерөнхийлөгчийн айлчлалын үеэр хоёр орны харилцааны түүхэнд анх удаа 45 минутын ганцаарчилсан уулзалттай, АНУ-ын Ерөнхийлөгч, Дэд Ерөнхийлөгч нар оролцсон өргөтгөсөн хэлэлцээтэй уулзалт болж, хоёр улсын харилцааг Стратегийн түншлэлийн хэмжээнд хүргэсэн нь манай дипломат албаны, түүний дотор элчин сайд Ё. Отгонбаярын том амжилт байсан нь маргаангүй. Өөрийнх нь айлчлалыг ийм амжилттай хийсэн хүнийг Ерөнххийлөгч ажил хийгээгүй гэж татаж байгаа нь хачирхалтай.

Элчин сайдын хүсэлтэнд Улаанбаатар хотын усан хангамжийн асуудлыг шийдэхэд АНУ-ын Мянганы сорилтын сангаас олгох 350 сая ам. долларын буцалтгүй тусламжийн гэрээг байгуулсан, Монгол улсыг ФАТФ-ын саарал жагсаалтаас гаргахад АНУ-ын дэмжлэгийг авсан, Монгол-Америкийн стратегийн түншлэлийг бэхжүүлэх тухай тогтоолыг АНУ-ын Конгрессийн Төлөөлөгчдийн танхимаар батлуулж, АНУ-д хөдөлмөр эрхлэх Н-2 визийн ангилалд Монгол улсыг хамруулж чадсан гээд олон л ажил дурдагджээ. 

Гуравдагч хөршийн худалдааны хуулийг батлуулах чиглэлд ажиллаагүй гэж ЕТГ-ын дарга Шижир элчин сайдыг буруутгаж харагдсан. Гэтэл элчин сайдын хүсэлтэнд уг хуулинд АНУ-ын Сенат, Төлөөлөгчдийн танхимын 94 гишүүний дэмжлэгийг авч чадсан тухай дурдагджээ. Манайх шиг жижиг улсын хуулийг 100 орчим гишүүнээр дэмжүүлэхийн тулд элчин сайд их л ажил хийсэн байж таарна. 

Хоёр жил гаруй явагдсан яриа хэлэлцээний үр дүнд АНУ-ын их, дээд сургуулиудад монгол оюутнуудыг хөнгөлөлттэй үнээр сургах, 2+2 хөтөлбөрийг хэрэгжүүлэх чиглэлд ахиц гаргаж, хэд хэдэн их сургуультай гэрээ байгуулсан тухай бичжээ. Монгол залуусыг Америкийн дотоод оюутны зардлаар сургах энэ ажлыг Боловсролын сайд байсан хүний хувьд Ё. Отгонбаяр л чадах байсан. Одоо энэ ажил харин зогсонги болох магадлалтай нь үнэхээр харамсалтай санагдлаа.

Харин монголчуудад амин чухал хэрэгцээтэй байгаа коронавирусын вакцины яриа хэлэлцээ, АНУ-ын Төрийн нарийн бичгийн даргын айлчлал, цар тахлын дараахэдийн засгийн сэргэлтийг хангахад АНУ-ын тусламж дэмжлэг авах, АНУ-тай Чөлөөт худалдааны хэлэлцээрбайгуулах, хоёр улсын хооронд шууд тогтмол нислэгтэй болох зэрэг асар чал асуудлууд яригдаж буй үед элчин сайдаа татан авч буй нь үнэхээр харалган, мунхаг алхам болж байна. Үүнийг тэгээд хэн хийх вэ, Ерөнхийлөгч өө?