УИХ-ын гишүүн Х.Ганхуяг, Х.Булгантуяа, П.Анужин, Д.Өнөрболор нарын дөрвөн гишүүн Хөрөнгө оруулалтын тухай хуулийн төслийг УИХ-д өргөн барьж, улмаар өнгөрсөн долоо хоногт чуулганы хуралдаанаар хэлэлцэхийг нь дэмжсэн. Гэвч хэлэлцүүлгийн явцад хууль санаачлагчид буюу УИХ-ын гишүүн П.Анужин, Д.Өнөрболор нар хуулийн төслөөс нэрээ татаж байгаагаа мэдэгдсэн. Эдгээр гишүүдэд Ёс зүйн хариуцлага тооцох уу гэдгийг УИХ-ын Ёс зүйн байнгын хорооны дарга Б.Бат-Эрдэнээс тодрууллаа.
Тэрбээр “УИХ-ын гишүүдийн ёс зүйтэй холбоотой олон асуудал яригдаж байгаа. Гэхдээ гишүүдийн ёс зүйтэй холбоотой асуудлыг ингэж шийднэ гэсэн нарийн зохицуулалт байхгүй. УИХ-ын ёс зүйн шинэ дүрэмд ёс зүйн алдаа гаргавал иргэдээсээ уучлал гуйх заалт оруулах гээд чадахгүй бүтэн жил болж байна. УИХ-ын гишүүд ёс зүйн дүрмийг өөрчлөөд биднийг чангалах гээд байна гэж бүгдээрээ эсэргүүцээд байна. УИХ-д өргөн бариад, ажлын хэсэг гарчихсан явж байгаа ч энэ өөрчлөлтийг хийж чадах, эсэхээ мэдэхгүй байна.
Хөрөнгө оруулалтын тухай хуулийг хэлэлцэх эсэхийг хэлэлцэж байхад би хэлсэн. Энэ хуулийн төслийг 2014 онд УИХ-д оруулж ирээд унаж байсан. Энэ хуулийн төслийг өргөн барьсан гишүүдтэй хариуцлага тооцох боломжгүй. Манай байнгын хороо гишүүдтэй хариуцлага тооцох ямар ч боломж байхгүй. Парламентын засаглалтай орнууд угаасаа ийм байдаг юм билээ. 2009 онд шахаж байж УИХ-ын гишүүний ёс зүйн дүрмийг арай гэж батлуулж байсан. Ёс зүйн байнгын хороо Ц.Анандбазартай хариуцлага тооц гэж хаваржангаа бичсэн. Гэтэл манай байнгын хороо билэг тэмдэг төдий л байгаа. Шатыг дээрээс нь шүүрддэг. Тиймээс УИХ-ын гишүүд өөрсдөөсөө эхлэх ёстой" гэлээ.
-6°C
Сэтгэгдэл (5)