Богд Зонхов бурхны хөшөөг 32 тэрбум төгрөгөөр барихаар 2022 оны төсөвт тусгаж УИХ-аар батлуулсан нь олон нийтийн бухимдлыг төрүүлээд байна. Энэ нь Соёлын сайд Ч.Номингийн хийж хэрэгжүүлэх ажлын багцад ороод буй юм.Энэ асуудлаар Соёлын сайд Ч.Номин мэдэгдэл гаргасан.
Тодруулбал, "Түүх, шашны соёлыг дэлгэрүүлэх "Богд Зонхова" цогцолборын төсөл намайг Соёлын сайдаар томилогдохоос өмнө эхэлсэн төсөл юм. Анх Соёлын яам энэ цогцолборыг барих, эхлүүлэх санаачилга гаргаагүй, өнгөрсөн хугацаанд энэ төсөлд нэг ч төгрөг зарцуулаагүй болно.Энэ хөрөнгө оруулалтыг цаг үеэ олоогүй гэж үзэж байгаа учраас Соёлын сайдын хувьд “Богд зонхова” цогцолборын төсөлд хөрөнгө зарцуулахгүй болохоо үүгээр мэдэгдэж байна гэх мэдэгдлийг гаргав.
Монгол Улс парламентын засаглалтай улс. Нэгэнт баталчихсан төсвийг нэг сайд мэдэгдэл гаргаж, цаг үеэ олоогүй тул зогсооя гэх нь хуулийн хүрээнд боломжгүй зүйл. Төсвийг зогсоож, өөрчлөх эрх сайдын эрхлэх хүрээнд байхгүй. Нэгэнт төсөв батлагдсан учраас Ерөнхийлөгч төсөвт бүхэлд нь болон хэсэгчлэн хориг тавих эрхтэй. Эсвэл төсөвт тодотгол хийх хуулийн төслийг УИХ-д өргөн барьж байж төсөвт "гар хүрэх" нөхцөл бүрдэнэ. Ийн атал Соёлын сайд Ч.Номин "Богд зонхова” цогцолборын төсөлд хөрөнгө зарцуулахгүй гэж тайлбар өгсөн нь хуулиа мэдэхгүйг харуулж буй юм. Тэрбээр төсвийн захиран зарцуулагч болохоос бус төсвийн хуулийг дураараа өөрчлөх эрх түүнд байхгүй. Ямартай ч олон нийтийн дунд шүүмжлэл дагуулсан "Богд Зонхова" цогцолборын төслийг цааш хэрхэх вэ гэдгийг өнөөдөр МАН-ын удирдлагууд ярилцжээ. Ерөнхийлөгч, тодорхой хүмүүсийг дуудаж уулзаж чиглэл өгсөн талаар УИХ дахь МАН-ын дарга Д.Тогтохсүрэн мэдээлсэн. Өөрөөр хэлбэл, Засгийн газар өөрөө төсвийн хуулийн нэмэлт, өөрчлөлтийг өргөн барьж дээрх төслийн санхүүжилтийг гацаах хуулийн төсөл ойрын хугацаанд өргөн баригдах нь ээ.
19°C
Сэтгэгдэл (10)