Хятад сүүлийн үед Интернэт, олон нийтийн сүлжээнд олон сая хүний анхаарал татаж байгаа юм болгонд туйлын хатуу чанга шаардлага, хараа хяналт тавих болсон.
Жишээлэхэд, Ханчжоу хотын татварын албанаас Viya online нэрээр Хятадын интернэтэд алдаршсан, онлайн худалдаа эрхэлдэг Хуан Вэй гэгчийг татвараас зайлсхийсэн хэрэгт буруутган 1,34 тэрбум юань буюу ойролцоогоор 210 сая долларын торгууль ногдуулсан тухай “South China Morning Post” сонин мэдээлсэн байна.
Энэхүү Viya online нь шууд нэвтрүүлгээрээ юуг л бол юуг зарж чаддаг гэдгээрээ Хятад даяар алдаршсан нэгэн байжээ. Түүнийг 2019-2020 онуудад борлуулалтын хувь тооцсон урамшууллаа нуусан, цалин хөлсөө компанийн орлого гэж бүртгүүлэн татвараас бултуулсан, ашиг орлогын тайлангаа цаг тухайд нь өгөхгүй байх гэх мэт янз бүрийн арга хэрэглэн нийт 700 сая юанийн татвар төлөхөөс зайлсхийсэн гэж буруутгаж байгаа аж.
Ямар ч хүн сонсоод шоконд ормоор өндөр торгууль ногдуулсан хэдий ч Viya online нь торгуулийг үг дуугүй хүлээн зөвшөөрч, хамтарч ажиллаж байгаа гэдгийг хотын татварын товчооныхон онцолжээ. Ийнхүү холбогдох байгууллагатай хамтран ажиллаж байгаа учраас Viya online-д их хэмжээний татвараас зайлсхийсэн гэж эрүүгийн хэрэг үүсгэхгүй, зөвхөн торгоод өнгөрөхөөр болсон байна.
Viya online нь Хятадын интернэтэд орлогоороо тэргүүлдэг инфлюенсерүүдийн нэг. Хятадад Viya online –тэй адилаар олон сая дагагчтай гэдгээ чадварлагаар ашиглан янз бүрийн бараа таваар сурталчлан борлуулж ашиг олдог хүмүүсийг “ванхун” гэж нэрлэдэг юм байна. Viya online нь нэгэн удаагийн стримийн үеэр сансарт пуужин хөөргөх үйлчилгээг 40 сая юаниар зарж, Хятадын интернэтийн од болж байжээ.
Үүний өмнө Хятадын татварын албаныхан Xueli Cherie нэрээр онлайн наймаа хийдэг Чжу Чэньхуэй, Xueli Cherie нэрээр онлайн худалдаа хийдэг Линь Шаньшань гэсэн Хятад интернэтийн одуудыг татвараас зайлсхийсэн гэж олон саяын торгууль ногдуулаад байсан аж.
27°C
Сэтгэгдэл (2)