2022/05/25
USD 2,811

"Эрчим хүчний яаманд албан хаагчдыг албан тушаалд томилсон зарим шийдвэр хууль тогтоомжид нийцээгүй"

Н.Мижидмаа
2022/01/21

Төрийн албаны зөвлөлөөс төрийн албаны тухай хууль тогтоомж, чадахуйн зарчмын хэрэгжилтийн талаар төрийн байгууллагын үйл ажиллагаанд хүний нөөцийн аудит хийхээр Төрийн албаны тухай хуульд тусгагдсан нь төрийн албаны шинэтгэлийн нэг томоохон алхам болсон билээ.

 Төрийн албаны зөвлөлийн “Хүний нөөцийн аудитын 2021 оны төлөвлөгөө”-нд төрийн захиргааны төв байгууллага буюу яамдад хүний нөөцийн аудитыг хийхээр төлөвлөсний дагуу 2021 оны 11, 12 сард Төрийн албаны зөвлөлийн аудитын баг бүрэлдэхүүн Эрчим хүчний яаманд хүний нөөцийн аудитыг хийж гүйцэтгэлээ.

 Хүний нөөцийн аудит нь төрийн байгууллагын хүний нөөцийн бодлого, үйл ажиллагаа хууль тогтоомж, чадахуйн зарчимд нийцэж байгаа эсэхийг үнэлэх, баталгаажуулах зорилгоор бодит нотолгоонд үндэслэн дүгнэлт гаргаж, хэрхэн засаж сайжруулах талаар зөвлөмж өгөх, түүний хэрэгжилтийг хангуулах хараат бус, бие даасан үйл ажиллагаа юм.

  “Төрийн захиргааны албан тушаалын тодорхойлолтын тусгай шаардлагын хэрэгжилт” сэдвээр Эрчим хүчний яаманд хийсэн аудитын дүгнэлт, зөвлөмжийг Төрийн албаны зөвлөлийн 2022 оны 01 дүгээр сарын 19-ний өдрийн хуралдаанаар хэлэлцлээ.

 Энэ нь Төрийн албаны зөвлөлөөс төрийн байгууллагад хийж байгаа анхны хүний нөөцийн аудит болсон бөгөөд Эрчим хүчний яамны хүний нөөцийн бодлогын баримт бичиг, яамны бүтэц, зохион байгуулалт, албан хаагчийг төрийн захиргааны албан тушаалд томилсон нөхцөл байдал, албан хаагчдын боловсрол, мэргэжил, мэргэшил, туршлагад тавигдах тусгай шаардлагыг хангаж байгаа байдал, сургалтын бодлогыг хэрэгжүүлсэн байдлыг тодорхойлох 5 зорилтын хүрээнд хийгдэж 5 бүлэг бүхий 33 дүгнэлтийг гаргасан байна.

 Аудитын дүгнэлтэд тус байгууллага албан хаагчдаа шатлан дэвшүүлж томилдог, урт хугацааны чөлөөтэй байгаа албан хаагчдын ажлын байрыг хэвээр хадгалдаг, албан хаагчдын сургалт, нийгмийн баталгааны хөтөлбөр, хөтөлбөрийг хэрэгжүүлэх жил бүрийн төлөвлөгөөг батлан хэрэгжүүлж байгаа зэрэг хууль тогтоомжийн хэрэгжилт хангагдаж байгаа нөхцөл байдлын талаар дурджээ.

 Үүний зэрэгцээ тус яамны чиг үүрэгт хууль тогтоомжоор өөрчлөлт ороогүй байхад байгууллагын зохион байгуулалтын бүтцийг өөрчилсөн, албан хаагчдыг албан тушаалд томилсон зарим шийдвэр хууль тогтоомжид нийцээгүй, албан тушаалын тодорхойлолтын зарим тусгай шаардлага хангагдахгүй байгаа, төрийн албан хаагчдын сургалтын хөтөлбөрийг хэрэгжүүлэх төсөв, хөрөнгөгүй зэрэг дутагдалтай талуудыг дүгнэж тайланд дурдсан байна.

 Хүний нөөцийн аудитын гол зорилго нь төрийн байгууллагын хүний нөөцийн бодлого, үйл ажиллагааг үнэлж, дүгнэсний үр дүнд зөвхөн тухайн байгууллагад зориулан хуулийн хэрэгжилтийг хангах, алдаа дутагдлыг засах, цаашид Эрчим хүчний яамны хүний нөөцийн үйл ажиллагаанд чадахуйн зарчмын хэрэгжилтийг хангах хүрээнд 12 чиглэлээр зөвлөмж гаргаж Төрийн албаны зөвлөлийн тогтоолоор баталгаажууллаа.

 Улмаар Эрчим хүчний яам уг зөвлөмжийг хэрэгжүүлэх төлөвлөгөө гарган ажиллаж, биелэлтийг 2022 оны 6 дугаар сарын 30-ны өдрийн дотор Төрийн албаны зөвлөлд танилцуулах юм.

 Төрийн албаны зөвлөлийн 2022 оны 12 дугаар тогтоолоор “Хүний нөөцийн аудитын 2022 оны төлөвлөгөө”-г баталсны дагуу энэ онд төрийн албаны чадахуйн зарчмын хэрэгжилт сэдвийн хүрээнд төрийн албаны хүний нөөцийн үйл ажиллагааны 23 асуудлыг хамруулан Засгийн газрын яам, агентлаг, орон нутгийн захиргааны байгууллагад хүний нөөцийн аудитыг хийхээр төлөвлөсөн болно.

Эх сурвалж: Төрийн албаны зөвлөл

 


Сэтгэгдэл (4)

ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.
103.212.118.78
Бүх төрийн байгууллагад иймэрхүү зүйл зөндөөө байгаа
Хариулах
192.82.75.69
Бүх яам иймэрхүү хууль зөрчөөстэй
Хариулах
192.82.83.104
Хөөрхий аудит хийсэн болоод ямар арга хэмжээ авахгүй бол ямар хэрэгтэй юм бэ. Үр дүнгүй ажил хийх юм.
Хариулах
66.181.185.69
Салар зөвлөүүдийн сонгон шалгаруулалт хэрхэн явуулж бгаа шалгах хэрэгтэй. Их зөрчил бгаа шүү
Хариулах