"Зариг" Хөгжлийн банкны найдваргүй зээлдэгчдийг цувралаар хүргэж байгаа билээ.
Хөгжлийн банкны дараагийн найдваргүй зээлдэгч “Мондулаан трейд ХХК”. Баянголын ам дахь Зүүн шанд, Улааншивэртийн амны алтны шороон ордыг ашиглах төслийг хэрэгжүүлэхээр 2018 оны 10 дугаар сард Хөгжлийн банкнаас 13.7 тэрбум төгрөгийг авсан бөгөөд хуримтлагдсан өр төлбөрийн хэмжээ өнөөдрийн байдлаар 17.7 тэрбумд хүрчээ.
“Мондулаан трейд” компанийн хувьцаа эзэмшигчдийн нэг нь “Нүүдэлчин групп” ХХК юм. Тус компанийн хувьцаа эзэмшигч Шүхэртийн Батнасан нь БСШУЯ-ны сайд асан Ё.Отгонбаярын эхнэр юм. “Нүүдэлчин групп” ХХК-ийн гүйцэтгэх захирлаар Ё.Отгонбаярын эхнэрийн эгч Ш.Бүтэд, түүний аав Б.Шүхэрт, хувьцаа эзэмшигчээр Шүхэртийн Жаргал, Шүхэртийн Лхамсүрэн нар ажилладаг үндсэндээ гэр бүлийн компани. Тус компани 2019 онд “Мондулаан трейд” компанийн хувьцаа эзэмшигчдээс хасалт хийлгэсэн бүртгэл байна.
Дашрамд дурдахад Нүүдэлчин групп ХХК Чингис хаан банктай нэр холбогддог бөгөөд гэр бүлээрээ тус банкинд өндөр хувь эзэмшдэг гэх мэдээлэл бий. Тус банкны хувьцаа эзэмшигч “Ньюстандарт финанс” ХХК-ийн гүйцэтгэх захирлаар Шүхэртийн Бүтэд ажилладаг бөгөөд “Ньюстандарт финанс” ХХК-ийн Чингис хаан банкинд эзэмшдэг дансаар тус банкнаас хахууль авсан удаа дараагийн үйлдэл илэрснийг зарим хэвлэл мэдээллэж байсан юм.
Түүнчлэн Нүүдэлчин групп ХХК нь Жижиг дунд үйлдвэрлэлээс болон Үнэ тогтворжуулах хөтөлбөрөөс зээл авч, иргэдийн боломжийг хумсалж байсан түүхтэй юм. Харин энэ удаа Хөгжлийн банкнаас зээл авч, иргэдийн боломжийг хулгайлсан нь олон нийтэд ил болж байна.
Сэтгэгдэл (0)
Сэтгэгдэл бичигдээгүй байна