Олон ястны өв соёлоо түгээн, таниулахад УИХ-ын гишүүн Ш.Адьшаа анхаарч ажиллав

Ховд аймаг байгалийн эрс тэс уур амьсгал бүхий байршилтай. Говь, талын хэсэгт аагим халуун төөнөж байхад Мөнххайрхан, Жаргалант, Цамбагаравхайрхны оргилд цас бударч байх жишээтэй. Уур амьсгалын эрс тэс нөхцлөөс  гадна урианхай, дөрвөд, захчин, казах, мянгад, өөлд, торгууд гэх мэт олон ястны өлгий нутаг. Ястан бүр өөр ёс заншил, соёл уламжлалтай хэдий ч  айлсан оршдог амьдралын өвөрмөц хэв маягтай ард түмэн юм. 

Тиймээс УИХ-ын гишүүн Ш.Адьшаа олон үндэстэн, ястны өлгий нутгийн ард олны уламжлал,  өв соёлыг түгээн дэлгэрүүлэх, залуу хойч үеэ сурган өвлүүлэх, биет бус соёлын гайхалтай өвүүдийг таниулах зорилготой олон ажлыг энэ зун хийв. Тухайлбал, “Дөрвөд угсаатны өв соёл”-ын анхдугаар наадмыг Ховд аймгийн Дөргөн суманд хийв. Мөн Урианхай, Тува түмний соёлын өвийн өдрүүдийг Баян-Өлгий аймгийн Толбо сумын нутаг Толбо нуурын хөвөөнд зохион байгууллаа. Энэ үеэр Баян-Өлгий, Ховд, Сэлэнгэ, Увс, Орхон, Дархан-Уул, Төв, Хэнтий, Хөвсгөл аймаг, ОХУ-д тархан суурьшсан 5000 орчим урианхай, тува иргэд хүрэлцэн ирж оролцсон байна. Тэд өөрсдийн идээ, ундаа, тоглоом наадгай, гар урлалаас эхлээд уламжлалт анагаах ухаан, хуримын зан үйлээ танилцуулж, ерөөл магтаал, тууль хайлж үзүүлсэн билээ.

Мөн ХБНГУ-ын Конрад Аденауэр сантай хамтран Хоршооны тухай хуулийг сурталчлах сургалт, 17 сумын 64 адуучин залуу  оролцож, авхаалж самбаагаа сорьсон “Адуучин” тэмцээнийг Ховд аймгийн Дарви суманд зохион байгуулжээ.