ОХУ-ын иргэнд зодуулсан Монгол залуугийн бөөр ажиллагаагүй болж аппаратад оржээ

Есдүгээр сарын 24-нөөс 25-нд шилжих шөнө ОХУ-аас орж ирсэн гурван иргэн архидан согтуурч улмаар нэг нь  Монгол Улсын иргэн Г-гийн толгойг алхаар балбан зодож  хүнд гэмтээсэн хэрэг гарсан. Иргэн Г Гэмтэл согог судлалын үндэсний төвд биеийн байдал нь хүнд байдалтай байгааг түүний ар гэрийнхэн хэлсэн. Хохирогчийн биеийн байдал маш хүнд, тархи нь гурван хэсэгтээ цоорсон, нүд нь бяцарсны улмаас нэг тал нь хараагүй болоод байгаа юм.

Бид иргэн Г-гийн ар гэрээс биеийн байдлынх нь талаар тодрууллаа.

 Өнөөдрийн байдлаар /2022.09.28/ иргэн Г-ийн биеийн байдал дээрдээгүй бөгөөд ухаан ороогүй байна. Ар гэрийнхэн нь "азаар ч болов ухаан орох боломж бий эсэх"-ийг эмчээс тодруулахад боломж тааруу болохыг хэлсэн байна. Мөн Г-ийн бөөр ажиллагаагүй болсон бөгөөд бөөрний аппаратад өнөөдрөөс оржээ. Хохирогч залууг эмнэлгээс хагалгаанд оруулахаар төлөвлөж байсан ч  хагалгаа хийвэл бие нь дийлэхгүй гэх тайлбарыг эмнэлгийн зүгээс өгсөн байна.

Монгол залууг зодож гэмтээсэн гэх ОХУ-ын иргэн “Д”-г хорих 461-р ангид саатуулаад байгаа юм. Мөн тухайн үед иргэн Г болон ОХУ-ын иргэдтэй хамт архи уусан гэх хоёр Монгол иргэнийг дуудаж мэдүүлэг авсан талаар ЦЕГ-аас мэдээлсэн.
ЦЕГ-ын мэдээллийг видеогоор үзэх:

Хохирогчийн ар гэрийн ярилцлагыг видеогоор үзэх: