Хөвсгөл аймгийн Баянзүрх сумаас 2022 оны I ээлжээр хилийн цэргийн 0245 дугаар ангид татагдаж, малын суурьт үүрэг гүйцэтгэж байсан 19 настай байлдагч С нь 2022 оны есдүгээр сарын 29-ний 13.00 цагийн орчимд модноос боомилсон байдалтай олдсон гэх мэдээлэл цацагдаад буй.
Уг хэрэгтэй холбогдуулан талийгаач цэргийн төрсөн эгч Ш манай редакцид хандлаа.
Түүнтэй бид утсаар холбогдоход тэрбээр "Дүү маань яаж амиа алдсан нь тодорхойгүй байхад худлаа мэдээллүүд их гарч байна. Дүү маань есдүгээр сарын 28-нд надтай утсаар ярихад огт санаа зовсон зүйлгүй байсан. Мөн есдүгээр сарын 29-нд шилжих шөнийн 1 цагийн орчимд танихгүй дугаараас аав руу 3-4 удаа дуудлага орж ирээд, аав утсаа аваад ярихад "Хүү нь сайн байгаа шүү, битгий санаа зовоорой" гээд хальтхан ярьсан гэсэн. Үүнээс хойш 16 минутын дараа дүүгийн минь залгасан дугаараас бүдүүвтэр хоолойтой согтуу эрэгтэй хүн залгаад "Байна уу, байна уу" гэж хэлээд салгасан гэсэн.
Өчигдөр /2022.09.29/ Увсын Улаангомоос ярьж байна, "Хүүгийн чинь биеийн байдал тааруу байна шүү, наашаа гараарай, бараг л найдваргүй болсон" гэж ярьсан. Харин өнөө өглөө /2022.09.30/ цэргийн ангиас нь залгаад "Хүү нь амиа хорлож нас барсан байдалтай малын суурингаас олдсон, хүүг нь Улаангомд авчирсан" гээд ярилаа. Миний дүү амиа хорлох үйлдэл хийх хүүхэд биш шүү дээ. 18-хан настай, цэрэгт явах дуртай болохоороо явсан. Газар үзээд, олон аавын хүүхдүүдтэй хамт алба хаагаад ирье гээд л цэргийн албанд явсан. Гэтэл ийм зүйл болсонд итгэж өгөхгүй байна. Аав, ээж маань Увсын Улаангом руу дөнгөж сая гарлаа. Манай гэр бүл үнэхээр гомдолтой байна. Аав, ээж нь ч очиж хараагүй байхад амиа хорлосон гэдэг мэдээлэл тарааж байгаад маш их харамсч байна" гэлээ.
Сэтгэгдэл (0)
Сэтгэгдэл бичигдээгүй байна