Иргэд хумсаа будуулах нь нэг төрлийн соёл болон хөгжөөд байна. Хумсаа тогмол будуулахдаа тухайн маникюрчин багаж хэрэгслээ ариутгасан эсэхийг сайтар хянаж эрүүл мэнддээ анхаарч байхыг зөвлөж байна.
Энэ удаагийн зөвлөгөө мэдээллээр бид Арьсны өвчин судлалын үндэсний төвийн хоёрдугаар тасгийн их эмч, Анагаах ухааны доктор С.Билгүүнцоожоос тодрууллаа.
Тэрбээр: Хумсаа гелен будгаар будуулахдаа байнгын давтамжтай гэрэлд шардаг нь хэт ягаан туяаг хэтэрхий ойрхон арьсандаа наагаад байна гэсэн үг. Энэ нь арьсны хавдар үүсгэх эрсдэлтэй байна. Олон дахин давтамжтай гэрэлд шарахгүй байх хэрэгтэй. Нөгөө талаасаа маникюрчид нэг ашигласан багаж материалийг ариутгал хийлгүй нэгээс нөгөөд олон давтамжтай ашиглаад байна. Энэ нь хумсны мөөгөнцөр үүсгэх гэх мэт эрсдэлтэй. Хумсны мөөгөнцөр нь нэгээс нөгөөд шууд хавьтлын замаар халдварладаг. Хумсны мөөгөнцөр эмнэлзүйн хувьд маш удаан илэрдэг. Томуу бол хэдхэн хоноод шууд л шинж тэмдэг нь илэрдэг шүү дээ. Харин хумсны мөөгөнцөр удаан архаг давтамжтай. Хумс нь шарлаж, унадаг шинж тэмдэг удаан хугацаанд илэрдэг.
Сэтгэгдэл (0)
Сэтгэгдэл бичигдээгүй байна