Тодруулга: Мөсөн дээр наалдсан 1000 гаруй зээрийг нуураас гаргасан, 40 орчим нь үхсэн байсан

Дорноговь аймгийн Айраг, Даланжаргалан сумын нутгаар 1000 гаруй цагаан зээр нүүдэллэн ирж, зарим нь цаг агаарын үзэгдлээс болж энджээ.  Бид энэ асуудлаар Даланжаргалан сумын Их нартын байгалийн нөөц  хамгаалалтын захиргааны дарга Т.Анандпүрэвээс зарим зүйлийг тодруулав.

"Өчигдөр 08:00 цагийн үед нутгийн иргэнээс мэдээллийг авч мэдсэн. Бид цагийн дараа очиж үзэхэд 1000 гаруй зээр мөсөн дээр наалдаж, зарим нь осгосон байсан. Ойрын өдрүүдэд цаг агаар цочир хүйтэрч байгаагаас гадна идэш тэжээл ховроос шалтгаалж цагаан зээр төв суурин газар руу олноор орж ирж байна. Өчигдөр шөнө 03:00 цагаас хойш хүчтэй шуурснаас болж уруудаж явсан зээрийн сүрэг  нуурын мөсөн дээгүүр дайрч гарах үеэрээ хальтирч унасан байна лээ. Учир нь зээр нарийн шовх туурайтай амьтан болохоор мөсөн дээр явах ямар ч боломжгүй. Тиймээс мөсөн дээр унаж, олон цаг байсан зээрийн зарим нь осгож үхсэн, хайрагдсан асуудал гарсан. Өмнө ч ийм тохиолдол гарч байсан. Өчигдрийн хувьд нийт 1000 гаруй зээрийг нуураас гаргахад 40 орчим нь үхсэн байсан" гэв. Өнөөдрийн байдлаар  мөсөн дээр наалдсан зээр байхгүй" гэв.