Нүүрсний хэрэгтэй холбоотой баривчилгааны үеэр найман хүнийг, "Цагдан хорих 461" дүгээр ангид саатуулсан. Тэдний нэг нь "Хишиг арвин индустрал" ХХК-ийн захирал Б.Хишигдорж юм. Тэрээр "Хишиг арвин индустрал" ХХК-ийн Ерөнхий захирал бөгөөд түүний хүү Хишигдоржийн Батхишиг нь тус компанийн гүйцэтгэх захирлаар ажилладаг байна.
“Хишиг Арвин Индустриал” ХХК-ийг Б.Ганхуягтай хэрхэн холбогддог талаарх яриа эртнээс эхлэлтэй. Тодруулбал, "Эрдэнэс Тавантолгой" ХК "Хишиг Арвин"-д зориулж тендерийн шалгаруулалт хийдэг болон өндөр дүнтэй гэрээг хийж ирсэн талаар хэвлэлүүд бичсээр ирсэн юм. Энэ яриа Б.Ганхуяг 2018 онд "Эрдэнэс Тавантолгой" ХК-ийн тэргүүн дэд захирлаас Гүйцэтгэх захирал болж дэвшсэн жилтэй давхцаж яригддаг нь хардах гол сэжүүр болдог юм.
Эх сурвалжийн мэдээлж буйгаар "Хишиг арвин индустрал" ХХК-ийн эзэн Б.Хишигдоржийн гэр болон оффист нэгжлэг хийж байгаа гэх мэдээлэл байна.
Дашрамд дурдахад “Хишиг Арвин Индустриал” ХХК нь гадаад худалдаа, сэргээгдэх эрчим хүчний засвар үйлчилгээ, уул уурхай машин тоног төхөөрөмжийн түрээсийн үйлчилгээ үзүүлэх чиглэлээр 2010 онд байгуулагдсан бөгөөд “Эрдэнэс Тавантолгой”-н Баруун, Зүүн цанхи, “Саусгоби Сэндс”-ийн Олон овоот, Оюутолгойн далд уурхай зэрэгт гэрээт олборлолтын болон дэд бүтцийн ажлуудыг хийж иржээ. Түүнчлэн зам, барилга зэрэг дэд бүтцийн олон ажлын үндсэн болоод туслан гүйцэтгэгчээр ажиллаж ирсэн байна.
Сэтгэгдэл (0)
Сэтгэгдэл бичигдээгүй байна