УБТЗ-ын Тээвэр зохион байгуулалтын албаны орлогч даргa С.Батдөлийн гэр, түүний хамаарал бүхий этгээдийн объектоос бэлэн 7 тэрбум төгрөг, 3 тэрбум төгрөгийн үл хөдлөх хөрөнгийн гэрчилгээ хураан авсан талаар бид өмнө нь мэдээлсэн. Улмаар С.Батдөлийг өнөөдөр /2023.01.09/ Шүүхээс нэг сар цагдан хорих шийдвэрийг гаргасан юм.
С.Батдөл нь 2021 онд томилогдсон, богинохон хугацаанд хөрөнгөжсөн албан тушаалтан хэмээн цагдаагийн байгууллагаас мэдээлсэн.
Мөн тэрбээр 2,3 тэрбум төгрөгийн үнэлгээ бүхий хаусыг иргэн н.Ванчиндоржоос худалдан авах гэж байхдаа баригджээ. Тухайн хаус нь Хүүшийн аманд байрших Япон маягийн гарден буюу Фүжи гарден хотхоны хаус аж.
Фүжи гарден төслийг хувьцаа эзэмшигчийг нь сонирхвол, 60 хувийг нь Монгол Улсын иргэн Д.Даваасүрэн, 40 хувь нь Япон улсын иргэн Мичио нар эзэмшдэг юм байна. С.Батдөл 2.3 тэрбум төгрөгийн худалдан авалтыг төслийг хэрэгжүүлэгч компаниас нь бус туслан гүйцэтгэгч тал буюу иргэн н.Ванчиндоржоос бартерынх нь хаусыг авахаар гэрээ байгуулсан гэх мэдээлэл бий.
АТГ, Эрүүгийн цагдаагийн албанаас хамтарсан ажлын хэсэг гарч С.Батдөлийн дээрх хэрэгтэй холбоотойгоор 18 хүнээс байцаалт авахаар болжээ.
Сэтгэгдэл (0)
Сэтгэгдэл бичигдээгүй байна