ЦЕГ: “FT GROUP”-т иргэд багадаа 650.000-150 сая төгрөгөө өгч залилуулаад байна

Цахим орчинд “FT group”, “Familymart”, “Wayfair” гэх нэршилтэй хэрэглээний программ гар утсандаа татан суулгана. Дараа нь олон улсын арилжааны биржээр дамжуулан цахим хэтэвч нээж, 60-20,000 ам.долларын барьцаа байршуулна. Улмаар дээрх аппликейшнийг  жилийн хугацаанд нээлттэйгээр ашиглаж сурталчилгаа түгээж, элссэн үнийн дүнгээс хамаарч өдөр бүр 2-50 ам.долларын урамшууллыг олгоно гэх мэтээр иргэдийг залилж, их хэмжээний хохирол учруулсан байж болзошгүй үйлдэлд цагдаагийн байгууллагаас мөрдөн шалгах ажиллагаа явуулж байна.

“FT group” аппликейшн нь манай улсын иргэдэд зориулан Монгол хэлний тайлбартайгаар цэс нээж, онлайн худалдааны сайт руу хандан даалгавар биелүүлж, урамшуулал авах байдлаар үйл ажиллагаа явуулсан байна.

Иймд иргэд та бүхэн дээрх залилах үйл ажиллагаатай холбоотойгоор таны хохирлыг төлж барагдуулна, хохиролгүй болгож өгнө гэх мэтчилэн хэн нэгний худал үгэнд итгэж, мөнгө шилжүүлэхгүй байж, хохирсон иргэд цагдаагийн байгууллагад хандахыг зөвлөж байна.