"Асарын өндөр" түүхэн дуулалт жүжиг тун удахгүй

МУУГЗ Л.Ванганы нэрэмжит хөгжимт жүжгийн театрын уран бүтээлчид Өндөр гэгээн, Гарын таван хуруу, Жангар зэрэг томоохон хэмжээний тайзны бүтээлүүдийг туурвиж Нийслэл Улаанбаатар хот болон орон нутгийн үзэгчдэд хүргэж, олон улсын хэмжээний уралдаант наадмуудад амжилттай оролцоод байсан. Тус театрын уран бүтээлчид төрөлх нутгийнхаа 100-н жилийн ойг угтан “АСАРЫН ӨНДӨР” түүхэн дуулалт жүжгийг тайзнаа туурвиж ирэх 5-р сард хөшгөө нээхээр бэлтгэл ажилдаа ороод байна.  

Монгол Улсад Хүннүгийн хаад язгууртны дурсгалт газар арваад буй. Эдгээр нь Ноён уул, Тахилтын хотгор, Гол мод, Дуурлиг нарс, Гол мод-2, ОХУ-ын Буриадын нутагт байдаг.

2022 онд Завхан аймгийн Алдархаан сумын нутаг Ямаан уснаас Хүннүгийн язгууртны томоохон дурсгалт газар илрээд байна. Хангайн нурууны баруун биеэс анх удаа олдоод буй уг дурсгалт газар Хүннүгийн Шаньюйн алтан ураг, Баруун гарыг захирах томоохон язгууртны булш байх боломжтой байгаа нь үндэсний бахархалыг төрүүлж байна.

Мөн Ямаан усны дурсгалт газраас 20-иод км-ийн зайд хот суурингийн туурь болон Хүннүгийн энгийн иргэдийн булш дурсгалууд олон тоотой байгаа нь Хүннүгийн гүрний үеийн суурьшлын томоохон бүс байсныг батлан харуулж буй юм.

Ази Европыг холбосон Их Торгоны замыг хянах болон Хятадын Хан улстай харилцах стратегийн ач холбогдол бүхий газар болохыг судлаачид мөн онцолж байгаа билээ.

2023 онд тохиох Завхан аймгийн 100 жилийн ой, 2022 онд Завхан аймгийн нутгаас Хүннүгийн язгууртны дурсгал олдсон түүхэн чухал үйл явдлуудыг Улс, орон нутгийн хэмжээнд сурталчлан таниулах, эх орныхоо түүхийг дээдлэх, соён гэгээрүүлэх, зорилгын хүрээнд Огторгуйн цагаан Гарьд сан,Л.Ванганы нэрэмжит Хөгжимт жүжгийн театр хамтран Б.Цогнэмэхийн зохиол “АСАРЫН ӨНДӨР“ түүхэн дуулалт театр жүжгийг 2023оны 05 сард нээхээр бэлтгэл ажилдаа орлоо.