Монголын баг "Газиантеп" хотын нисэх буудалд газардлаа

35 хүний бүрэлдэхүүнтэй эрэн хайх, аврах баг  “Буянт-Ухаа” олон улсын нисэх буудлаас өглөөний 04:34 цагт Турк улсыг зорьсон.

Тэд зорьсон газраа саадгүй хүрч Газиантэп хотын нисэх буудалд орон нутгийн цагаар 09.50 буюу Монголын цагаар 13.30 цагт амжилттай газардлаа. Тэд одоо гамшгийн голомт болох Хасан хот руу автобусаар 200 километрын хөдөлгөөн үйлдэн очих бөгөөд яг одоо онгоцноос хүмүүнлэгийн тусламжийн бараа, материалыг ачаалах ажил хийгдэж байна.

Халуун сэтгэл өвөрлөн эх орныхоо захиас даалгаварыг биелүүлэхээр үүрэг аван мордсон зоригт хөвгүүд, охиддоо амжилт хүсэхийн хамт, тэднийг зорьсон газарт нь саадгүй тээвэрлэн хүргэсэн “Mongolian Airways” компанийн хамт олонд халуун сэтгэлт ард түмнийхээ өмнөөс гүн талархал илэрхийлье. 

Мөн энэ мөчид Франц, Солонгос, Итали Улсын цэргийн эмнэлгийн багууд Газиантэп хотод буугаад байгаа аж.