​ Газар хөдлөлтөд эхнэр, хүү хоёроо алдсан аав 4 настай охинтойгоо уулзлаа

Газар хөдлөлтөөс аврагдсан 4 настай охиныг аавтай нь уулзуулж буй бичлэг цахим орчинд тархан олон хүний сэтгэлийг догдлуулаад байна. Уг бичлэгт охины аавын хүлээж буй өрөөнд охиныг нь дагуулан орж ирэхэд хүүхэд аавыгаа хараад шууд л нулимс дуслуулан, аавыгаа чанга тэвэрч буй нь харагдана.

Анадолу агентлагийн мэдээлснээр, Ахмед Аян эхнэр, хүү хоёроо газар хөдлөлтөд алдсан байна. Тэрээр Туркийн өмнөд хэсгийн Хатай мужийн төв Антиох хотод 4 настай охин Гадагийн хамт байшингийнхаа нурангид дарагдсан байсан бөгөөд эсэн мэнд аврагдсан билээ. Аав охин хоёрыг нурангиас аварсаны дараа нэн дариу эмнэлэгт хэвтүүлэн, хоёр өөр газар эмчлүүлж байсан юм. Эдгэрч эмнэлгээс гарсныхаа дараа Аян охиноо хайж эхэлжээ. Энэ хооронд Гадагийн гэр бүлийн гишүүд олдохгүй байсан тул Гэр бүл, нийгмийн үйлчилгээний яамнаас түүнийг Хатай дахь асрамжийн газарт шилжүүлсэн байна.

Эх сурвалж: khaleejtimes.com/world/watch

Гэрэл зураг: khaleejtimes.com