Хэрцгийгээр хөнөөгдсөн загвар өмсөгч дөрвөн хүүхдийн ээж байжээ

Хонгконгийн хамгийн алдарт загвар өмсөгч, инфлюнсер Эбби Чойгийн хэрцгийгээр хөнөөгдсөн аллагад хуучин нөхөр, хадмууд нь буруутай болохыг анхан шатны мөрдөн байцаалтаар тогтоож, шүүхэд шилжүүлээд байна. 

Түүний хуучин нөхөр Алекс Квонг, Квонгийн ах Энтони, тэдний аав Квонг Кау нарыг яллагдагчаар татжээ.  63 настай Квонгийн ээж хэрэгт оролцоогүй ч нуун дарагдуулсан, мөрдөн байцаах ажиллагаанд саад учруулсан гэж буруутган бүгдийг нь саатуулан хорьж, батлан даалтад гаргахаас татгалзжээ. 

Чойгийн толгой болон биеийн бусад хэсэг нь Тай По дүүргийн Лүнвей тосгоны гурван давхар байшингаас олдсон бөгөөд тус газар руу түүнийг хуучин жолоочоор ажиллаж байсан хадам ах нь авч явсныг харсан хүн мэдээлжээ. Бүсгүй хамгийн сүүлд Мягмар гарагийн үдээс хойш охиноо авахаар явж байгаа тухайгаа ар гэрийхэндээ хэлснээс хойш сураггүй болжээ. Гэвч тэрээр охиноо очиж аваагүй, утас нь холбогдохгүй болсон тул түүнийг мягмар гарагт алга болсон гэж үзэж байна. Аллага болсон газар нь бүсгүй Ковлун хотод хамгийн сүүлд харагдсан газраас ойролцоогоор 27 км зайд байжээ.

Хонконгийн цагдаа нар Чой болон түүний хуучин хадмууд их хэмжээний мөнгө, санхүүгийн маргаантай байсан, аллага үүнээс үүдэлтэй гэж хэвлэлд мэдэгдсэн.

Алекс Квонг өнгөрсөн Бямба гарагт завиар хотоос гарах гэж байгаад баривчлагдсан бөгөөд түүний эцэг эх, том ахыг нь өмнөх өдөр нь саатуулжээ. Цагдаа нар мөн Ням гарагт Чойгийн хадам аавтай холбоотой 5 дахь сэжигтнийг баривчилжээ. Чойгийн экс нөхөр болох Алекс Квонг өмнө нь  5 сая Хонгконг доллар залилсан хэргээр мөн эрэн сурвалжлагдаж байсан тухай мэдээлэл байна. Гэхдээ уг мэдээллийг цагдаа нар өгөөш болгон цацсан ч байж болох талтай.

Чой экс нөхөр Алекс Квонгоос хоёр хүүхэдтэй, 2016 оноос хойш хамтран амьдрагч Крис Тамаас хоёр хүүхэдтэй болсон аж. Тэрээр Хонгконгийн хамгийн алдартай, үлгэр жишээ хүмүүсийн нэг байжээ.

Эх сурвалж: www.bbc.com