"Гурван настай хүүгийн зургаан настай ах хэрэгт гэрчийн мэдүүлэг өгнө"

Гурван настай хүү хойд эцэгтэй зодуулж энэ сарын 8-нд ГССҮТ-д ухаангүй байдалтайгаар хүргэгдэж, хэвтэн эмчлүүлж байгаа. Шалгалтын явцад Л-ийн хамтран амьдрагч Э нь 3-6 насны хөвгүүдийг гэртээ харж үлдэхдээ гурван настай Б-г зодсон байж болзошгүй байдал урьдчилсан байдлаар тогтоогдсон талаар Цагдаагийн байгууллагаас мэдээлсэн. 

Бид хүүгийн аавтай уулзаж тодруулахад "Хүүг маань хойд эцэгтээ зодуулсныг ээж нь цагдаагийн байгууллагаас нуун дарагдуулсан үндэслэлээр баривчилагдсан. Мөн хүүг хоёр хоногийн дараа эмнэлэгт хүргэсэн нь үнэн. Хүүгийн 6 настай ахыг төрсөн аав нь өөр дээрээ авсан" талаараа ярьсан билээ.

Өнөөдрийн байдлаар хүү “ухаан ороогүй, биеийн байдал хэвэндээ, ямар ч өөрчлөлт ороогүй”  байгаа юм. 

Бид энэ асуудлаар ГБХЗХГ-аас зодуулсан хүүгийн ахынх нь сэтгэл санааны байдал ямар байгаа талаар зарим зүйлийг тодрууллаа. Тэрбээр " Ямар нэгэн байдлаар гэмт хэргийн хохирогч болоход хүүхдийн төрөл садан, асран хамгаалагчдын зүгээс үйлдэгдсэн байвал ямар нэгэн эрх ашгийн хохироох үйлдэл гэж үзээд цагдаагийн байцаалт, хууль сахиулахын байгууллага, хүүхэдтэй холбоотой мэдүүлэг тайлбарыг авахтай холбоотойгоор хууль ёсны төлөөлөгчийг томилдог  байгаа. Энэ хүрээнд  манай байгууллагаас төлөөлөгч томилон ажиллуулсан. Тухайн нөхцөлд төрсөн аав байгаа учраас хүүхдийнхээ хууль ёсны төлөөлөгчөөр нь ажиллаад явж байгаа. 

Зургаан настай хүүгийн хувьд гэрчийн мэдүүлэг өгөх шаардлагатай болсон. Уг хэрэгтэй холбоотойгоор өмгөөлөгч томилон ажиллуулж байна. Мөн аавынхан ах нь хууль ёсны төлөөлөгч давхар ажиллаад явж байна. Өдөр тутамдаа  бид гэмтлийн эмчтэй холбогдож, хүүгийн биеийн байдлыг давхар авч байгаа. Мөн хүүхэд хамгааллын чиглэлээр ямар нэгэн байдлаар дэмжлэг үзүүлэх тал дээр ажиллаж байна. Мөн ар гэрийнхэнтэй нь холбоотой байгаа.

Одоогийн байдлаар аавынх зүгээс ямар нэгэн байдлаар төрийн дэмжлэг авах хүсэлт ирээгүй байна. Зодуулсан хүүгийн ахынхан хувьд гэрчээр байгаа, тухайн үед хамт байсан, бүх зүйлийг харсан байгаа. Сэтгэл санааны хувьд шокийн байдалтай байгаа. Үүнтэй холбоотойгоор манай зүгээс сэтгэл зүйч томилоод ажиллаж байна.