ХНХЯ: Хүүхдийн мөнгө бодох аргачлалд өрхийн зээлийн мэдээлэл байхгүй учраас орлогоор нь тооцож байгаа

ХНХЯ-ны Бодлого төлөвлөлтийн газрын дарга А.Хишигбаяраас хүүхдийн мөнгөний асуудлаар тодруулга авлаа. Тэрбээр "Иргэд И-монголиа ашиглан өөрсдөө мэдээллээ шалгаж үзээд, мэдээллээ засах  боломжтой. Тухайн иргэний хаяг зөрүүтэй, эсвэл машинаа зарсан атал мэдээлэл нь өөр дээр нь бүртгэлтэй байгаад байвал мэдээллээ засна гэсэн үг. Шинэ хүүхэд төрсөн бол энэ тухай хүсэлтээ мөн шинэчлэх ёстой. Өнөөдрийн байдлаар хичнээн иргэн мэдээллээ зассан болохыг манайх мэдэх боломжгүй, харин хүсэлтээ өгсөн хүмүүсийн хүсэлтүүд ихээр ирж байгаа. Иргэн өөрөө мэдээллээ засахгүй бол бидний зүгээс засах боломжгүй. 

Иргэд хүсэлтээ гаргасан сараасаа эхлэн хүүхдийн мөнгийг нөхөж авах боломжтой. Бид төрийн мэдээллийн сан дээр үндэслэж байгаа. Орлого, зээлийн мэдээлэл нь байгаа атлаа тухайн өрх сард хэдэн төгрөгийг зээлд төлдөг вэ гэсэн мэдээлэл нь мэдээллийн санд байхгүй. Өөрөөр хэлбэл, хүүхдийн мөнгө бодох аргачлалд өрхийн зээлийн мэдээлэл байхгүй учраас орлогоор нь тооцож байгаа. Хэрвээ цахимжаад ороод ирвэл, тооцуулах боломжтой" гэлээ.