Хэнтий аймгийн 2004 оны төгсөгчдийн төлөөллүүд нэгдэн “Итгэл төгс нөмөр сан” төрийн бус байгууллага байгуулж, орон нутагтаа “Ид шидийн орон-Хэнтий” хүүхэд хөгжлийн төв байгуулахаар шийдвэрлэж, ажлаа эхлүүлжээ. Тус төв нь хүүхдийг хөгжүүлэх, хамгаалах зорилготой бөгөөд иргэдийн сайн дурын үндсэн дээр, сайхан сэтгэлт ард түмний хандив дэмжлэгээр бүтээн босдогоороо онцлогтой. Үүнийхээ хүрээнд 4 дүгээр сарын 21-нд Чингис хотын цэцэрлэгт хүрээлэнд барилгын шав тавьж хандивын үйл ажиллагааг эхлүүлсэн байна.
Нээлтийн арга хэмжээний үеэр 6-18 насны сурагчдын дунд зарласан гар зургийн болон захидлын уралдаанд шилдгээр шалгарсан 10 хүүхдэд Найрамдал зусланд амрах эрхийн бичиг гардууллаа. Энэхүү ажлыг эхлүүлэхэд аймгийн Засаг дарга, түүний Тамгын газар, харьяа агентлагууд идэвх санаачилгатай оролцож байгаа бөгөөд эхний ээлжинд 0,7 га газар, цахилгаан дэд бүтцийн асуудлыг шийдвэрлэж байгаа бол үргэлжлүүлээд цаашид үйл ажиллагаа явуулах ашиглалтын зардлыг хариуцахаар болжээ. Бүтээн байгуулалтын ажлаа тавдугаар сарын 1-нд эхлүүлж аравдугаар сард ашиглалтад оруулахаар төлөвлөж байгаа талаар төсөл санаачлагчдын зүгээс танилцууллаа.
Сэтгэгдэл (0)
Сэтгэгдэл бичигдээгүй байна