Боловсролын зээлийн хулгайн асуудлаар Уул уурхай, хүнд үйлдвэрийн дэд сайд асан О.Батнайрамдал мэдээлэл хийсэн юм.
Гадаад улсад бакалавр, магистр, докторын зэрэгт суралцахаар Боловсролын зээлийн сангаас 2368 суралцагч нийт 363 тэрбум төгрөгийн зээл авчээ. Үүний 90 хувь нь өндөр албан тушаалтан, мэдээлэлд ойр хүмүүсийн үр хүүхдэд олгогдсон болох нь олон нийтэд ил болоод байна. Өнөөдрийн байдлаар зээлийн эргэн төлөлт бараг 100 хувь хийгдээгүй, үүний дээр эргэн төлөлт хийгдээгүй зээлийн 41 хувийг үе үеийн Боловсрол шинжлэх ухааны сайдын тушаалаар чөлөөлсөн байна.
Гэтэл сайдын тушаалаар зээлийг чөлөөлөх боломжгүй. Дээд боловсролын санхүүжилт, суралцагчдын нийгмийн баталгааны тухай хуулийн 8.8-д ”Суралцагчийн сургалтын төлбөр, амьжиргааны зардалд зориулан олгох хөнгөлөлттэй, эргэн төлөгдөх нөхцөлтэй зээлийн улсын төсвийн оролцоотой эх үүсвэрийг бүрдүүлэх, эргэн төлүүлэх, сургалтын зээлийг хөнгөлөх, чөлөөлөх, хүчингүй болгох журмыг Улсын Их Хурал тогтооно” гэж заажээ. Тэгэхээр сайд нар хууль бус чөлөөлөлт хийсэн гэсэн үг. Засгийн газрын тогтоол болон зургаан сайдын тушаалаар 867 суралцагчийн 80.2 тэрбум төгрөгийн зээлийг чөлөөлсөн байгаа юм.
Зээл авсан зарим хүмүүсийн зүгээс гадаадад суралцаж ирээд эх орондоо таван жил ажилласан бол зээлээс чөлөөлөгдөнө гэх тайлбарыг өгч байгаа бол уг журам 2012 онд Засгийн газрын тогтоолоор хүчингүй болжээ.
Сэтгэгдэл (0)
Сэтгэгдэл бичигдээгүй байна