БЗС: Б.Энхбаяр тэргүүтэй дөрвөн хүн магадлан итгэмжлэгдээгүй сургуульд сурчээ

АНУ-ын Цагаачлалын албанаас Хойд Виржинийн их сургуулийн гадаад оюутан хүлээн авах эрхийг 2013 онд цуцалж, 2014 онд тус сургууль магадлан итгэмжлэлгүйгээр үйл ажиллагаа явуулсан асуудлаар шүүхэд хүртэл дуудагдаад байжээ. Тус сургууль нь АНУ-д төдийлөн танигдаагүй бөгөөд Энэтхэгийн оюутнуудад зориулсан сургууль гэж тодорхойлогддог аж. 

Дэлхийн шилдэг их дээд сургууль бүү хэл АНУ дотроо ч танигдаагүй сургууль гэж хэлж болох юм. Түүнчлэн тус сургуулийн үйл ажиллагаа 2014 оноор дуусгавар болсон байх магадлалтай байна. Сургуулийн вэбсайт болон сургуультай холбоотой мэдээлэл цахим орчинд байршаагүй байна. Ийм сургуульд дэлхийн шилдэг их дээд сургуульд суралцах оюутнуудад зээл олгох журамтай БЗС-гаас нэр бүхий хүмүүст сургалтын зээл олгосон байдаг. Мөн эдгээр хүмүүс уг зээлээ тэглүүлсэн байдаг юм.
Жагсаалтын тэргүүн эгнээнд УИХ-ын гишүүн Б.Энхбаяр орж байна. Тэрбээр 2007 онд АНУ-ын Хойд Виржинийн их сургуульд суралцахдаа 32 мянган ам.долларын зээл авсан бөгөөд уг зээлийг БСШУ-ны сайд асан Ц.Цогзолмаагийн 2018 оны 8 сарын 31 өдрийн А/555 тоот тушаалаар тэглүүлсэн байдаг. Гэсэн ч тэглүүлсэн зээлээ тэрээр сангийн мэдээлэл олон нийтэд ил болохтой зэрэгцэн БЗС-нд эргүүлэн төлсөн юм.
Түүний араас Самбуугийн Отгонсүрэн 2006 онд Хойд Виржинийн их сургуульд суралцахдаа 32 мянган ам.долларын зээл авч уг зээлээ БШУ-ны сайд асан Л.Гантөмөрийн 2014 оны 11 сарын 25 өдрийн А/459 тоот тушаалаар, Халзангийн Батжаргал 2007 онд 32 мянган ам.долларын зээл авч БСШУ-ны сайд асан Ц.Цогзолмаагийн 2018 оны 8 сарын 31 өдрийн А/555 тоот тушаалаар, Баясгалангийн Оргилсайхан мөн 32 мянган ам.долларын зээл авч БСШУ-ны сайд асан Г.Чулуунбаатарын 2017 оны 7 дугаар сарын 27-ны А/88 тоот тушаалаар тус тус тэглүүлсэн байна.