Д.Сумъяабазар: Үер усны аюул өнгөрсний дараа хот даяар цэвэрлэгээ хийнэ

О.Шүрэнцэцэг
2023/07/06

Улаанбаатар хотод үргэлжлэн бороо орж, үерийн нөхцөл байдал үүссэнтэй холбогдуулан Нийслэлийн онцгой комиссоос цаг үеийн мэдээлэл өглөө.

Нийслэлийн Засаг дарга бөгөөд Улаанбаатар хотын Захирагч, Нийслэлийн онцгой комиссын дарга Д.Сумъяабазар:

-Хан-Уул, Сонгинохайрхан, Сүхбаатар, Баянзүрх, Баянгол дүүргийн найман байршилд үерийн нөхцөл байдал үүсээд буй. Эдгээр байршилд Нийслэлийн Онцгой байдлын газар, Цагдаагийн удирдах газар, Геодези, усны барилга, байгууламжийн газар, Ус сувгийн удирдах газар, Замын хөгжлийн газар, Цахилгаан түгээх сүлжээ ТӨХК, Улаанбаатар Зам засвар, арчлалтын газар, Улаанбаатар хотын Захирагчийн ажлын алба, зэвсэгт хүчний анги байгууллага, дүүргүүдийн гамшгаас хамгаалах албаны нийт 1050 ажилтан, алба хаагч 122 техниктэй 24 цагийн турш үүрэг гүйцэтгэн ажиллаж байна.

Сонгинохайрхан дүүргийн 25 дугаар хорооны 170 дугаар цэцэрлэг орчим, 9 дүгээр хорооны зам дагуу, Сүхбаатар дүүргийн 1 дүгээр хороонд Сэлбэ гол гэсэн байршилд далан хальсан. Мөн Сүхбаатар дүүргийн 15 дугаар хороо буюу Дамбадаржаа орчим, Баянзүрх дүүргийн 43 дугаар хороо Сэлбэ голын зүүн тал, “Алтай” хотхоны орчмын нөхцөл байдлыг хяналтдаа аваад буй.

Үерт автсан айл өрхүүдээс Чингэлтэй дүүрэгт 50, Сүхбаатар дүүрэгт 12 айл өрхийг нүүлгэн шилжүүлсэн. Цаашид нүүлгэн шилжүүлэх шаардлагатай айл өрх Чингэлтэй дүүрэгт 100 орчим, Сүхбаатар дүүрэгт 17, Сонгинохайрхан дүүрэгт 20 байна.

Сэлбэ голын хамгаалалтын бүсэд баригдсан барилга байгууламжийн талаар товч мэдээлэл хүргэх нь зүйтэй. Тодруулбал, Сүхбаатар дүүргийн 1 дүгээр хороонд байрлах “S Outlets” 2009 онд Нийслэлийн Засаг даргын захирамжаар иргэн Д.Батзориг Сэлбэ голын хамгаалалтын бүс дэх 288 ам метр газрыг автомашины засвар, үйлчилгээний зориулалтаар иргэн А.Амарсайханаас 15 жилийн хугацаатай шилжүүлэн авсан. Нийслэлийн Засаг даргын  2009 оны захирамжаар талбайн хэмжээг 1665 мкв, 2015 онд 2409 мкв болгож нэмж олгосон байна. Анх түр байрны зориулалтаар албан даалгавраа авсан ч зориулалтын дагуу ашиглаагүй байгууламж юм.

Түүнчлэн “авлига хороолол” гэгдээд буй “Эм энд Жи констракшн” компанийн барилгын тухайд мэдээлэл өгье. Тодруулбал, Нийслэлийн Засаг даргын 2008 оны захирамжаар Хан-Уул дүүргийн 15 дугаар хорооны нутаг дэвсгэрт 118000 м.кв орон сууцны зориулалттай газрыг таван жилийн хугацаатай ашиглуулахаар баталгаажуулсан. Хожим 2013 онд ногоон байгууламж, усан парк, спорт цогцолборын зориулалтаар олгогдсон 11.8 га газарт 2014 онд архитектур төлөвлөлтийн даалгавар, загвар зургийг батлуулсан байна. Гэтэл Нийслэлийн Засаг даргын 2018 оны захирамжаар “Эм энд Жи констракшн” ХХК-д 29,444 ам метр газрыг үйлчилгээний зориулалтаар, 79,875 ам метр газрыг үйлчилгээ усан парк, спорт цогцолбор зориулалтаар ус тус хэсэгчлэн талбайн хэмжээ, зориулалт өөрчилсөн байна.

Нийслэлийн Засаг даргын 2020, 2021 оны захирамжаар дээрх газрын эзэмших эрхийн гэрчилгээг хүчингүй болгож шийдвэрлэсэн ч Захиргааны хэргийн анхан шатны шүүхийн шийдвэрээр газар эзэмших эрхийг дуусгавар болгосон. Улмаар шүүхийн шийдвэрийн дагуу дээрх захирамжуудыг хүчингүй болгож шийдвэрлэсэн. Ингээд Нийслэлийн Засаг даргын 2022 оны захирамжаар худалдаа, нийтийн үйлчилгээний газар, төв цогцолбор, орон сууц болгон зориулалтыг өөрчлөн, хэсэгчлэн хувааж шийдвэрлэсэн юм.

Гол үерлэсэн газруудад сэтэлгээ хийснээр усны урсац нэмэгдэж байна. Тухайлбал, ТЭЦ-4, Гурвалжингийн гүүр, АПУ ХХК-ийн ар зэрэг дөрвөн байршлын гүүрэнд томоохон сэтэлгээ хийсэн.Түүнчлэн нийт 18 байршилд усны урсацыг нэмэгдүүлэх сэтэлгээг хийж байгаа.

Хүндрэл үүссэн байршлууд дээр Зэвсэгт хүчний 250 орчим албан хаагч ажиллаж буй, цаашид мөн 100 цэрэг хүч нэмж ирнэ.  Түүнчлэн ХСИС,  Шүүхийн шийдвэр гүйцэтгэх газар, Хилийн цэргийн сургуулиас  100-150 алба хаагч Чингэлтэй дүүргийн 13, 15, Сүхбаатар дүүргийн 13, 15 дугаар хорооны байршлууд дээр зохион байгуулалтад ороод ажиллаж байна. Үүн дээр нэмээд Хил хамгаалах ерөнхий газрын 100, Шүүхийн  шийдвэр гүйцэтгэх газраас 210 алба хаагч машин техниктэй хүч нэмж ажиллах нь. Мөн нийтэд тустай ажил хийлгэх ял эдэлж буй 180 гаруй хүн ажиллаж байна. Хүндрэлтэй нөхцөл байдлыг хэвийн түвшинд оруулахын тулд дотоодын цэргийн анги, нэгтгэлээс 150 алба хаагч, онцгой байдлын 565 алба хаагч, цагдаагийн бие бүрэлдэхүүний 461 алба хаагч гурван байршилд ажиллаж байна.

Үерийн аюулаас сэргийлэх, нөхцөл байдал хүндэрсэн байршилд ажиллахад хувийн хэвшлийн аж ахуйн нэгж, иргэд оролцож, дэмжиж байна. Тухайлбал, уул уурхайн чиглэлийн үйл ажиллагаа явуулдаг компаниуд үүсээд байгаа нөхцөл байдалд  хөрөнгө санхүү гаргахаас гадна ковш болон бусад машин механизмуудыг дайчлан ашиглуулж байна. Энэ бүхэнд Улсын болон Нийслэлийн онцгой комиссын зүгээс талархаж байгаагаа бас илэрхийлье.

Улаанбаатар хотынхоо тулгамдсан асуудлыг бид хамтдаа шийдэж ажиллах нь чухал юм.  Үүнд ард иргэд, ААН, компаниуд идэвх санаачилга, хүчин чармалт гаргаасай гэж хүсэх байна гэлээ.      

НЗДТГ-ЫН ХЭВЛЭЛ МЭДЭЭЛЭЛ, ОЛОН НИЙТТЭЙ ХАРИЛЦАХ ХЭЛТЭС


3
angry
1
care
1
haha
0
liked
0
love
2
sad
0
wow

Сэтгэгдэл

Zarig.mn сайтын Редакцын бодлогын 6.1; 6.2; 6.3 –т дурдсан үндэслэлээр сэтгэгдэл бичих талбарыг хаасан болно.
Шинэ мэдээ
Монгол Улсын Ерөнхийлөгч У.Хүрэлсүх Үндэсний их баяр наадмыг хааж үг хэллээ 15 цагийн өмнө
Монгол Улсын Ерөнхийлөгч хурдан морины унаач хүүхдүүдэд баяр хүргэж бэлэг гардуулав Өчигдөр
Монгол Улсын начин, харцага цолны болзол хангасан бөхчүүдэд цол олголоо Өчигдөр
ЗГ-ын гишүүн Л.Энх-Амгалан Боловсролын шинэ сайд П.Наранбаярт үүрэгт ажлаа хүлээлгэн өглөө 2024/07/10
Наадмын өдрүүдэд ажиллах томоохон худалдаа, үйлчилгээний газруудын цагийн хуваарь 2024/07/10
Хотоос гарах замын хөдөлгөөний ачаалал эрс нэмэгдэж байна 2024/07/10
Засгийн газрын гишүүд тангараг өргөлөө 2024/07/10
Ерөнхий сайд Л.Оюун-Эрдэнэ сайд нараа танилцуулав 2024/07/10
Төсвийн байнгын хорооны даргад УИХ-ын гишүүн Ц.Даваасүрэнг нэр дэвшүүлэхийг дэмжлээ 2024/07/10
Д.Цогтбаатарыг Хууль зүйн байнгын хорооны даргаар сонгохыг дэмжлээ 2024/07/10
Засгийн газрын шинэ гишүүдийг Монгол Улсын Ерөнхийлөгчид танилцууллаа 2024/07/10
Сонсголонгийн уулзвараас баруун аймгууд руу салдаг уулзвар хүртэлх 9.5 км замыг шинэчиллээ 2024/07/09
Бутаны Хаант Улсын Цог Жавхлант Хаан Жигмэ Гэсэр Намжил Ванчуктай албан ёсны уулзалт хийлээ 2024/07/09
Аж үйлдвэржилтийн бодлогын байнгын хорооны даргаар С.Ганбаатарыг сонгов 2024/07/09
3арим Байнгын хорооны бүрэлдэхүүнд өөрчлөлт оруулах тухай Улсын Их Хурлын тогтоолын төслийг батлав 2024/07/09
Өнөөдөр "Дээлтэй Монгол" үндэсний хувцасны наадам болно 2024/07/09
Баяр амралтын өдрүүдэд онцгой байдлын байгууллага бэлэн байдалд ажиллана 2024/07/09
Дуу цахилгаантай бага зэргийн аадар бороо орно 2024/07/09
Ерөнхий сайд 22 сайд, 16 яамтай ажиллана 2024/07/08
Танилц: АН-аас айлд очих сайдууд 2024/07/08