"Playtime Festival" хөгжмийн наадмыг 01.00 цагт зогсоохоор боллоо

"Playtime Festival" хөгжмийн наадмыг 01.00 цагт зогсоохоор боллоо.  Playtime наадмын арга хэмжээг зохион байгуулагчдад НОК-ын шуурхай штабаас үйл ажиллагааг зогсоох зөвлөмж хүргүүлсэн. Одоогоор ноцтой байдал үүсээгүй ч Туул гол дагуу зохион байгуулагдах учир нөхцөл байдал хүндрэх эрсдэл бий гэж үзсэн. 

Хэрэв нөхцөл байдал хүндэрвэл НОК-оос шуурхай арга хэмжээ авч, арга хэмжээг албадан тараана гэх мэдээллийг өгсөн билээ.

МЭДЭГДЭЛД:

"Нийслэлийн нутаг дэвсгэрт орсон их хэмжээний борооны улмаас үүссэн үерийн аюул, гамшгийн нөхцөл байдалтай холбогдуулан PLAYTIME олон улсын хөгжмийн наадам Гамшгаас хамгаалах өндөржүүлсэн бэлэн байдлыг зарлан үүнтэй холбогдуулан дараах арга хэмжээг авч ажиллан хэрэгжүүлэхээр болсноо мэдэгдэж байна.

Өнөөдрийн хувьд хөтөлбөрийг шөнийн 01:00 цаг хүртэл хязгаарлалт хийн, хязгаарлалтын цагаас хойш хөгжмийн болон худалдаа үйлчилгээний нэгжүүд ажиллахгүй болно.

Гадаадаас ирсэн өнөөдөр тоглох Shortparis, Carsick Cars хамтлагууд, DJ Answer The Code, Rickhter нар 01:00 цагаас өмнө та бүхэнд уран бүтээлээ хүргэх болно.
Бидний зүгээс голын хэсгийг бүрэн хамгаалалтад авч, цаг тутам хяналт тавин Онцгой байдлын албатай хамтран ажиллаж, зохион байгуулалтын бүх нэгжүүдийг өндөржүүлсэн хамгаалалт, бэлэн байдлын зэрэгт шилжүүлж ажиллаж байна.

Энэ нь зөвхөн одоогийн нөхцөл байдлаас үүдэн гаргасан шийдвэр бөгөөд уг цагийн хуваарь наадмын хөтөлбөрт тогтмол үйлчилнэ гэсэн үг биш юм.

Иймд Playtime наадмын үзэгчид та бүхэн энэхүү онцгой нөхцөл байдлыг хүндэтгэн, өөрсдийн аюулгүй байдалд анхаарч голын эрэг дагуу очихгүй байхыг хичээнгүйлэн хүсэж байна" гэжээ.