БНСУ-д согтуугаар тээврийн хэрэгсэл жолоодож, цусан дахь спиртийн хэмжээ 0.2%-иас дээш бол хорих ялтай

БНСУ-д суугаа Монгол Улсын Элчин сайдын яаманд ажилладаг дипломат ажилтан согтуугаар машин жолоодож яваад цагдаад баригджээ. Тус улсын цагдаагийн байгууллагаас мэдээлснээр тус ажилтан А өчигдөр буюу 10 дугаар сарын 10-ны өглөөний 9 цагийн орчимд Гимпо чиглэлд Олимпийн өргөн чөлөөнд согтуугаар тээврийн хэрэгсэл жолоодож яваад баригджээ. А нь тухайн үед хурдаа нэмж, огцом тооромслох үйлдэл гаргаж байсан тул ойр орчмын жолооч нар нь цагдаагийн байгууллагад мэдээлэл өгсөн байна. Цагдаагийн ажилтан машиныг зогсоож, согтолтын зэргийг тогтоох гэсэн боловч А нь халдашгүй байдал хэмээн татгалзжээ. Гэвч архины үнэр ханхалсан, согтуурлын зэрэг хэмжигчид хариу урвал илэрсэн гэж цагдаагийн байгууллагаас тайлбарлажээ. Үүний дараа БНСУ-д суугаа Монгол Улсын Элчин сайдын яамны ажилтнууд ирж А-г авч явсан байна. 

"Тэгвэл БНСУ-д согтуугаар тээврийн хэрэгсэл жолоодвол хуулийн ямар хариуцлага хүлээх вэ?"

БНСУ-д согтуугаар тээврийн хэрэгсэл жолоодож, хүний амь нас эрсэдсэн тохиолдолд бүх насаар нь эсвэл 3 жилээс дээш хугацаагаар хорино.

Харин согтуугаар тээврийн хэрэгсэл жолоодсон тохиолдолд хохирогч байхгүй ч Замын хөдөлгөөний тухай хуулийн дагуу "Зам тээврийн осол гарах магадлалтай" гэсэн үндэслэлээр цусан дахь согтуурлын зэргээс хамаарч оноо хасах, эрх хасах, эрүүгийн шийтгэл ногдуулдаг байна. Цусан дахь спиртийн хэмжээ 0.2%-иас дээш тохиолдолд 2-5 жил хорих ял эсвэл 10-20 сая вонтой тэнцэх хэмжээний мөнгөөр, 0.2%-иас доош тохиолдолд 1-2 жил хүртэл хугацаагаар хорих эсвэл 5-10 сая воноор торгох, 0.03- 0.08% бол нэг жилээс илүүгүй хугацаагаар хорих эсвэл 5 сая воноос илүүгүй торгууль ногдуулдаг байна. Харин согтуугаар тээврийн хэрэгсэл жолоодсоны улмаас хүний амь нас эрсэдсэн тохиолдолд бүх насаар нь эсвэл 3 жилээс дээш хугацаагаар хорих шийтгэл оногдуулдаг байна.