Талийгаач Г.Ганжаргалын амиа алдсан хэргийн газарт анх үзлэг хийсэн шинжээчийг шалгахаар болжээ

Монгол Улсын зөвлөх эмч, Анагаах ухааны доктор, дэд профессор Г.Ганжаргал 2022 оны долоодугаар сарын 09-ний өдөр Архангай аймгийн нутаг дэвсгэрт байрлах "Хасу Шивэрт" рашаан сувиллын гаднаас нас барсан байдалтай олдсон.

 Талийгаачид хоёр удаагийн задлан шинжилгээг ар гэрийнх нь хүсэлтээр хийсэн юм. Илэрхий, шарх сорвитой буюу гадны нөлөөтэй амь насаа алдсан байж болзошгүй байхад Шүүх эмнэлэг "өндрөөс унасан" гэх дүгнэлтийг гаргасан нь хэргийн хувь заяаг ээдрээтэй болгож, талийгаачийг амиа хорлолт хэмээн хэргийг хаах гэж байна хэмээн ар гэрийнхэн нь мэдээлсэн. Улмаар шинжлэх ухааны үндэслэлгүй Шүүх эмнэлгийн хоёр удаагийн дүгнэлтээ тайлбарлахыг ШШЕГ-аас шаардсан. 

Энэ хүрээнд Шүүх шинжилгээний ерөнхий газар /ШШЕГ/-аас дахин шинжээч томилж ажиллахаар болсон билээ. Түүнчлэн  өнөөдөр /2023.10.18/ Монгол Улсын Ерөнхий прокурор Б.Жаргалсайхан талийгаач Г.Ганжаргалын эхнэр А.Отгонцэцэгийг хүлээн авч уулзжээ. Энэ үеэр талийгаачийн нас барсан хэргийн газарт анх үзлэг хийсэн шинжээчийг дутуу шалгасан байж болзошгүй хэмээн үзэж Прокуророос шалгах үүргийг өгчээ.