ЗАСГИЙН ГАЗРАА ОГЦРУУЛАХААР ГАРЫН ҮСЭГ ЗУРСАН ГИШҮҮД ХЭН ХЭН БАЙВ

УИХ-ын нэр бүхий гишүүд засгийн газар огцруулах бичиг өргөн барилаа. Ерөнхий сайд Ж.Эрдэнэбатын танхим огцрох ёстой гэдгийг 30 гишүүн дэмжиж гарын үсэг зурсан байна. Дөнгөж сая УИХ-ын гишүүн Ж.Энхбаяр, Т.Аюурсайхан, Л.Оюун-Эрдэнэ нар УИХ-ын дэд дарга Я.Санжмятавд хүлээлгэн өглөө. Засгийн газар огцруулах бичгийг УИХ-ын гишүүн Т.Аюурсайханы албан бланкаар үйлдсэн байна. Ард түмэн энэ засгийн газарт Ерөнхийлөгчийн сонгуулиар муу дүн тавьсан. Дээр нь сайд нар концессын асуудалд холбогдсон, Эрдэнэт үйлдвэр, Чингис, Самурай бондын зарцуулалтыг хянах талаар ажил хийгээгүй гээд огцруулах олон шалтгаан байгааг гишүүд тайлбарлалаа. Үндсэн хуулинд зааснаар Засгийн газрыг огцруулах тухай асуудлыг УИХ 15 хоногийн дотор хэлэлцэн шийдвэрлэх юм. УИХ-ын намрын чуулган 10 сарын 1 нд эхэлдэг. Тэгвэл өнөөдөр Засгийн газар огцруулах бичиг өргөн барьснаар ээлжит бус чуулган зарлагдах нь тодорхой болж байна.