2015 онд Том Круз найруулагч Даг Лаймантай хамтран American Made киног бүтээсэн юм. Киноны зураг авалтын үеэр хоёр нисэгч-орлон тоглогч нас барсан эмгэнэлт явдал гарсан.
Тэгвэл амь үрэгдсэн нисэгчдийн гэр бүлийнхэн Том Крузыг буруутгаж буйгаа илэрхийлжээ. Колумбын өндөр уулсын дунд аль болох эрсдэлтэй, үзүүштэй зураг авалт хийхийн тулд Том Круз шахалт үзүүлж, удаан дараалан зураг авалтыг улам хүндрүүлсээр байгаад эцэст нь хоёр хүний аминд хүрсэн гэж ар гэрийнхэн нь үзэж буй юм байна.
Даг Лайман, Том Круз
Онгоцны ослын улмаас Алан Пурвин, Карлос Берл нар амиа алдсан юм. Том Круз тухайн хэсгийн зураг авалтынхаа талаар ярихдаа "Тэр 48 цаг миний амьдралын хамгийн галзуу хугацаа байсан" гэж өгүүлсэн удаатай ажээ.
Том Круз амь үрэгдсэн нисэгчийн хамт
American Made кинонд Колумбын Медельинд суурьшсан АНУ-ын тусгай мэдээлэгч, нисэгч Барри Силийн тухай өгүүлдэг. Энэ нисэгч хар тамхины хаан гэгдэгч Пабло Эскобарыг баривчлах ажиллагаанд оролцож байсан ажээ.
Том Крузын киноны зураг авалтын үеэр зургийн багийнхнаас амиа алдсан анхны тохиолдол энэ биш юм. Үүнээс өмнө Top Gun киноны зураг авалтын үеэр нисэгч-орлон тоглогч Арт Шолль хэт хэцүү нисэлт хийх гэж байгаад жолоодлогоо алдан далайд унасан гунигт түүх бий. Арт Шоллийн цогцсыг ч, онгоцны сэгийг ч олоогүй юм.
М.Болджин
Сэтгэгдэл (0)
Сэтгэгдэл бичигдээгүй байна