ӨМНӨД СОЛОНГОСЫН АРВАН МЯНГАН АЖИЛТАНД 631 РОБОТ НООГДДОГ

Дэлхийн өнцөг булан бүрт байдаг үйлдвэрүүдэд механикжсан буюу робот машинуудын тоо ихээр нэмэгдэх болжээ. Австри улсад л гэхэд арван мянган ажилтанд 144 робот ноогддог байна. Энэ үзүүлэлтээрээ Австри улс дэлхийд 14-рт бичигдэж байгаа бол Европт арван мянган ажилтанд 99 робот машин ноогддог байна. Одоогийн байдлаар арван мянган хүнд ноогдох робот машины тоогоороо Өмнөд Солонгос улс тэргүүлж байгаа бөгөөд тус улсад үйлдвэрийн арван мянган ажилтан тутамд 631 робот, Сингапурт 488 робот, Германд 309 робот буюу ажил хөнгөвчлөх автомат машин ноогдож байна. Эдгээр улсуудын араас Япон, Швед, Дани, АНУ, Итали, Бельги, Тайван зэрэг орнууд эхний аравт багтаж байна гэж "Олон улсын роботикийн нэгдсэн хороо" мэдээллээ. "Жагсаалтын 23-рт орсон БНХАУ 2020 он гэхэд дэлхийд роботынхоо тоогоор тэргүүлэгч болох зорилтыг тавин ажиллаж байна. Энэ улсад 2013 онд арван мянган ажилтанд 25 робот ноогддог байсан бол 2016онд 68 болж өссөн. Жагсаалтын сүүлчийн байранд ОХУ, Филиппин, Энэтхэг зэрэг орнууд бичигдсэн" гэж аж үйлдвэрийн салбарын удирдагчид мэдээлж байгаа юм. Хүн амд ноогдох роботын өсөлтийг 2010-2016 оны байдлаар бүсчлэн танилцуулбал Азид 9%, Америкт 7% Европт 5%-тай байсан байна.